Мамырдың 6-ы күні Болгарияның София қаласында күрес түрлерінен әлемдік іріктеу турнирі басталады. Бұл жолғы бәсекенің орны бөлек. Өйткені осы жарыста Олимпиадаға жолдама беріледі.
Бұл сынға Қазақстан құрамасының балуандары бақ сынайды. Софиядағы бәсеке – Олимпиадаға жолдама беретін соңғы сайыс. Қазір еліміздің балуандары қызу дайындық үстінде. Олардың арасында Шымкент қаласының спортшысы Әлімхан Сыздықов та бар. Грек-рим күресінен аса ауыр салмақ – 130 келіде Әлімхан Сыздықов Олимпиада жолдамасы үшін бозкілемге шығады. Спортшы таяуда Алматыда өткен Азия чемпионатында күміс жүлдегер атанды. Спорт шебері, Қазақстан біріншілігінің бірнеше дүркін жеңімпазы. Семей қаласында өткен Б.Тұрлыханов халықаралық турнирінің күміс жүлдегері. Олимпиада жолдамасына таласатын байрақты бәсекеде балуандарымыз бабында болсын!Ж.АҚҚАЙЫР