Кеше Алматыда Қолөнер палатасы қала тұрғындарына шеберлердің туындыларын ұсынып, жәрмеңке ұйымдастырды. Ай сайын ұйымдастырылатын мұндай жәрмеңкеге осы жолы Алматы маңында орналасқан Көк шоқы ауылының шеберлері қатысты.
– Бірде үйде тоқымадан тоқылған дүние көбейіп, жиналып қалды. Қызым екеуміз ауылдағы базарға шығып, сатпақ болдық. Жасаған дүниемізге көбі қызықты. Солардың бірі Алматыда қолөнерге байланысты жәрмеңке өтетінін және оған қатысып көруді айтты. Бағымызды сынап көрмек болдық. Сөйтіп, 2017 жылдың мамыр айында Алматыдағы Арбатта өткен жәрмеңкеге қатыстық. Сол жерден киізден жасалған үлкен алманы көріп, қызығып кеттім. Бағыма қарай, сол жерде киізден алма жасаудан шеберлік сабағы жүріп жатты. Міне, содан бері киіз басу қолөнерімен айналысып кеттім, – дейді Тамара Чурсина.
Жәрмеңкеге көрнекті суретшілер, еңбегі сіңген геологтар, музыканттар мен атақты қолөнер шеберлер қатысуда.