Көкшетауда көптеген ойын алаңы кеңес заманынан бері жөндеу көрмеген. Темірлері қисайып, сырғанақтары сықырлап, қисайып кеткен. Ал бағандары мен ескі бетон қабырғаларынан арматуралары шығып кеткен. «Басқа ойнайтын жері қалмаған балақайлар үстіне шығып, киімдерін жыртып, құлап үсті-басын жарақаттайды», – дейді Көкшетау қаласының тұрғындары. Талай мәрте жергілікті атқарушы билік өкілдеріне ащы зарын айтқанымен, жанайқайларын естір құлақ таппай зар илеген тұрғындар мәселелерін әлеуметтік желілерге де жаза бастаған.
Кеңес заманынан бері алды кемінде 40-50 жылдан асып кеткен ойын алаңдарының жағдайы шынымен мәз емес. Әрі облыс орталығындағы ойын алаңдарының жартысынан астамы осындай күйде. Балаларын ойнататын жер таппай зар илеген тұрғындар іштегі мұң-назын ақтарып, барлық мән-жайды жіпке тізді.Қала әкімі тікелей бақылауына алса да, түк өзгермеген
«Біз қаланың шеткі жақ ауданы Элеватор ауданында тұрамыз. Біздің аулалардың жағдайына ешкімнің де басы ауырмайды. Бізге келіп көрсеңіздер, өзіміз аулалардағы ойын алаңының жайын түгел көрсетіп береміз. Сүлейменов көшесі 12В мекенжайындағы біздің аулада шағын футбол алаңы бар. Ортақ емес жалға алынған. Соған кешкісін футбол ойнауға келіп, көлігімізді қоятын орын таппаймыз. Мен дәл осы аулада тұрамын. Ал мұндағы балалар ойын алаңын біз «Жылауық қабырға» деп атаймыз. Өйткені оның жан-жағынан арматуралары шығып кеткен. Үстінде қағынып-ұшынып балалар ойнап жүреді. Секіріп түсемін деп киімдерін жыртады. Құлап, аяқ-қолын жарақаттаған кезі аз емес», – дейді Сүлейменов көшесінің Камила есімді тұрғыны. Тұрғындар ойын алаңдарын жөндеуді қала әкімінің өз бақылауына алғаны туралы құжаттар мен газеттер қолында бар екенін де айтты.Орнында тек «Жылауық қабырға» ғана қалды
«Менде қала әкімі 2019 жылы бұл аулалардың жөнделетінін айтып, тікелей өзінің бақылауына алатыны жөнінде жазылған газеттер мен құжаттар бар. Бірақ үш жылдан бері әлі еш нәтиже жоқ. «Баяғы жартас – бір жартас» күйі әлі күнге сол қалпы келеді. Қала әкімінің есіне осы жайды тағы бір мәрте салғымыз келеді. Бәлкім, есіне түскен соң қимылдап, кеңес заманынан бергі жөндеу көрмеген ойын алаңдарымыз жөнделіп қалатын шығар. Айтылып отырған алаңда біздің де балалық шағымыз өткен. Бұл қабырғаны біз кезінде «қамал» деп атайтынбыз. Ал сол «қамалымыздың» қазір талқаны шыққан. Істік темір арматураларына балаларымыз үйден шыққан сайын киімдерін, үсті-басын жыртып келеді. Ол кездері ауламызда құм салынған құмсалғыштар, тіпті карусельге дейін болған. Қазір олардың бірі де жоқ. Орнында тек «Жылауық қабырға» ғана қалды», – дейді Айгүл Әбдірәшитова есімді Сүлейменов көшесі 12Б үйдің тұрғыны.
Зерттеу барысында жөндеу көрмей жағдайы адам шошырлық күйге түскен балалар ойын алаңының талайын көрдік. Мәселен, Көкшетау қаласындағы Пушкин көшесі 25, Калинин көшесі 5, Алтынсарин көшесі 41 және 39 мекенжайларындағы ойын алаңдары 50 жылдан бері бір де бір мәрте жөндеу көрмепті. Дәнекерленген темірлері мен қадалары босап, баскетбол дөңгелектері түсіп қалған. Сырғанақтардың қаңылтыры майысып, әткеншектерінің темірлері үзіліп түскен. Орындықтардың тақтайлары ұшып, сырланбағанына талайдың жүзі болған.
«Иә, бұл мәселе аса өзекті. Тұрғын үйлердің алдында жөндеуді қажет ететін және жөнделетін балалар ойын алаңының тізімі қашан шығатынын ешкім білмейді. Қалалық мәслихатта олар қашан анықталмақ? Неге елу жылдан бері еш жөндеу көрмеген балалар ойын алаңдарына жөндеу жүргізбейді? Бұл сұрақтарды қала әкімінің есептік кездесулерінде жыл сайын қоямыз. Бірақ құрғақ уәдеден басқа ешнәрсе көре алмай келеміз», – дейді Әсем Қапарова.
Биыл тек төрт ойын алаңы жөндеу көрмек...
Толғағы жетіп, халықтың әбден ашуына тиген жағдайды жергілікті атқарушы билік органы Көкшетау қаласы әкімдігіне жеткіздік. Бірақ жөнделмеген ондаған ауланың әлі де болса талай жылдар бойы сол қалпы тұратынын берген жауаптан анық аңдағандай болдық. Әкімдіктің берген жауабы төмендегідей болды. «Биыл Көкшетау қаласындағы 4 ойын алаңына сметалық құжаттар жасалды. Олардың мекенжайлары қалалық мәслихатпен келісілгеннен кейін анықталатын болады», – дейді Көкшетау қалалық әкімдігінің ресми жауабында.P.S.
Сонымен, жарты ғасырға жуық уақыттан бері жөндеу түгілі сырланбаған аулалардың қашан жөнделетіні белгісіз. Ал ондай аулалар Көкшетауда ондап, тіпті жүздеп саналады. Ал тұрғындар мұндай аулалардың іс жүзінде саны 70-80 пайызға дейін жетіп жығылатынын айтады... Аулалардың қашан қалпына келіп, балалардың қашан бақытты күйде өз аулаларында асыр салатынын айту қиын.
Абзал АЛПЫСБАЙҰЛЫ, Ақмола облысы