Түркістан облысында карантин талаптарын өрескел бұзып, бесік той жасаған тұрғын анықталды, — деп хабарлайды ҚазАқпарат.
Қазіргі таңда коронавирус індетіне байланысты елімізде карантин режимі енгізілгені баршамызға белгілі. Осыған қарамастан, халық ағайын-туыс, дос-жарандарын шақырып, ұлан-асыр той жасауын тоқтатар емес.
Осы тұста карантин талаптарының сақталуын қадағалау мақсатында құрылған арнайы мобильдік топтар, той-жиындарға жиналған көпшілікті тарқатуда. Бұл бағыттағы жұмыс тұрақты жүргізілуде. Мәселен, Мақтаарал полиция қызметкерлері сағат 11:40 шамасында Мақтаарал ауданындағы тойханалардың бірінде бесік тойы өтіп жатқанын анықтады.
Тойға 80-нен астам адам жиналған. Мобильді топ тұрғындарға түсіндіру жұмыстарын жүргізіп, тойды дер кезінде тоқтатып, адамдарды үйіне тарқатты. Карантин талаптарын елемеген той иесіне қатысты ҚР ӘҚБтК-нің 425-бабы бойынша іс-құжаттар жинақталып, заңды шешім қабылдау үшін Мақтаарал аудандық СЭББ-ға жолданды.
Өз кезегінде Түркістан облысының полицейлері барлық азаматтарға карантин кезінде сақтық шараларын ұстанып, адамдар көп шоғырланған жерге бармауды, басқосулар мен той-жиындарды жасамауды ескертеді. Карантин ескерілмей, құқық бұзушылыққа жол берілген жағдайда заң аясында жауапкершілік қарастырылған.
