Тараз қаласындағы Қ.Рысқұлбеков атындағы саябақта «Nur Otan» партиясы облыстық филиалы жанындағы Жастарды қолдау жөніндегі аймақтық қоғамдық кеңес отырысы өтті.
Еркін форматтағы кеңес отырысына жас депутаттар, қоғам белсенділері, еріктілер ұйымының жетекшілері және жастар қоғамдық бірлестіктерінің төрағалары қатысты. Күн тәртібінде жастар саясаты саласындағы мемлекеттік бағдарламалардың орындалуы, тұрғын үйді жеңілдікпен несиеге алу бойынша жастардың үлесін арттыру және студенттік жатақхана салу мәселелері көтерілді. Жиында алдымен облыстық Жастар саясаты мәселелері басқармасының басшысы С.Берікқожаның баяндамасы тыңдалды. Ол бүгінде «Әулиеата жастары» бағдарламасының жобасы әзірленіп жатқанын айтты. Бағдарлама арқылы өңір жастары баспананы жеңілдетілген несиемен ала алады. Аталған жоба аймақ жастарын тұрғын үймен қамтуға септігін тигізбек. Бұдан кейін М.Дулати атындағы Тараз өңірлік университетінің әкімшілік-шаруашылық мәселелері жөніндегі проректор С.Мұсаев жатақхана мәселесі туралы айтып өтті. Қазір Таразда 516 орындық жатақхананың құрылысы жүргізіліп жатыр. Құрылыс жұмыстары жаңа оқу жылына дейін аяқталып, пайдалануға беріледі деп жоспарланып отыр. Аталған мәселе бойынша облыстық Білім басқармасы басшысының міндетін атқарушы Т.Жамалов та баяндама жасады. Қазір облыстағы 3 колледжге 750 орын жатақхана қажет. Мәселені шешу үшін Тараз қаласындағы ескі ғимарат қайта жөндеуден өткізіліп, жатақхана ретінде пайдалануға берілетін болады. Кеңес отырысы соңында ұсынымдар қабылданып, күн тәртібіндегі мәселелер бақылауға алынды.Әбілмансұр ЖАСАН