«Қайрат» футбол клубының бас бапкері Кирилл Кекер Еуропа лигасы үшінші іріктеу кезеңіндегі «Алашкертке» қарсы қарымта кездесуден кейін қызметінен кетті.
Ереванда өткен матчтың негізгі уақыты тең аяқталды – 2:2. Қосымша уақытта алаң иелері жеңісті жұлып әкетті – 3:2. «Қайрат» сапынан Денис Поляков пен Айбол Әбікен алаңнан қуылған соң, алматылықтарға тоғыз ойыншымен амалдауға тура келді. Ал бірінші кездесуде қос клуб тең тарқасқан еді. «Өкінішке қарай, біз өзімізге қолайлы нәтижеге қол жеткізе алмадық. Осыған байланысты мен бас бапкер қызметінен кетуге шешім шығардым. Клубқа маған сенім артып, негізгі құрамның бас бапкері ретінде жұмыс істеу мүмкіндігі үшін алғыс айтамын», – деді Кекер. Кирилл Кекерден кейін «Қайраттың» бас бапкері міндетін Артем Гавриленко атқаратын болды. Алматылық клуб үшін еурокубок ойындары аяқталған жоқ. Олар Конференция лигасының плэй-офф кезеңінде өнер көрсетеді.А.ЖОЛДАС