Елордада Тәуелсіздіктің 30 жылдығына орай әскери-тарихи музей жанындағы алаңда мемлекет қайраткері Жұмабек Тәшеневке ескерткіш қойылды.
«Көрнекті мемлекет қайраткері, еліміздің гүлденуіне үлкен үлес қосқан Жұмабек Тәшеневке ескерткіш ашып отырмыз. Осыған дейін Нұр-Сұлтанда ұлы тұлғамызға көше аты берілген болса, жуырда мектепке есімі қойылды. Енді, міне кезек ескерткішке келіп отыр. Ағамыздың мүсіні комиссия мүшелерінің, зиялы қауым өкілдерінің, ұрпақтарының келісімімен құйылды. Дәл сондай-ақ ескерткіштің тұрған орны да мүдделі тараптардың келісімімен таңдалды. Бүгінгі елорда Отанымыздың тек саяси ғана емес, мәдени және рухани ордасы. Бүгінге дейін Нұр-Сұлтанда еліміздің танымал тұлғаларына арналған бірқатар ескерткіш ашылды. Тәуелсіздігіміздің 30 жылдығы қарсаңында пандемияға қарамастан еліміздің руханиятын көтеретін бастамалар ары қарай да жалғаса береді», – деді Нұр-Сұлтан қаласы әкімінің орынбасары Асхат Оралов. Ашылу салтанатына қатысқан белгілі мемлекет қайраткері, ғалым Мырзатай Жолдасбеков еліміздің өркендеуі жолында еңбек еткен азаматтардың аз болмағанын, олардың арасында Жұмабек Тәшеневтің шоқтығы биік екенін айрықша атап өтсе, мемлекет және қоғам қайраткері Оралбай Әбдікәрімов: «Мемлекеттік тұлғаға ашылып отырған ескерткіш Тәуелсіздіктің жарқын жемісі. Тарихи тұлғамыздың мүсіні елордамыздың төріне орнатылып отыр. Қуанышымыз құтты болсын! Жұмабек Тәшенев өз елінің перзенті ретінде ел алдындағы парызын өтеген тұлға деп есептейміз» деген жүрекжарды лебізін жеткізді. Салтанатты шараға қатысқан қоғам қайраткерінің ұлы Саян Жұмабекұлы мен келіні Фатима Садыққызы сөз сөйлеп, Елбасына, Мемлекет басшысына алғысын білдірді. «Жұрт менен «Әкеңнің атын неліктен насихаттамайсың, елге сіңірген еңбегін не үшін айтпайсың?» деп сұрап жатады. Ал менің ойымша, елге сыйлы азаматтың еңбегін халқы өзі бағалауы тиіс. Бүгінгі ашылып отырған ескерткіш халықтың әкеме деген сый-құрметі деп білемін», – деді Саян Жұмабекұлы. Ескерткіштің авторлары – сәулетші Қ.Қорғанов пен мүсінші Е.Ержанов. Мүсін қоладан, тұғыры граниттен құйылған, ескерткіштің жалпы биіктігі – 8,2 метр. Тәуелсіздіктің 30 жылдығына орай биыл елордада мәдениет пен жалпы елдің дамуына үлкен үлес қосқан белгілі қазақ қайраткерлеріне арналған ескерткіш топтамасы ашылды. Бұған дейін қалада алашордашыларға, Дина Нұрпейісова, Талғат Бигелдинов, Қаныш Сәтбаев сынды тұлғаларға ескерткіштер қойылған болатын. Сәулелі ескерткіш көпшіліктің көңіліне сәуле құйып, жүрегін жылытты. Ел тәуелсіздік жолында еңбек еткен тұлғаларын құрметтеп, қадірлей бермек. Ақын Мирас Асан көңіліндегі көрікті ойды мынадай жыр шумақтарымен жеткізген екен: «Бабаңның бұзбай текті арда салтын, Төске алып қоңыр белді жанға салқын, Мүсін боп қазағыңа қайта келдің, Сен қорғап қалған жердің әр тасы алтын!» Ақиқаттың ақ семсері секілді Алаштың айбарына айналған тұлғаға қойылған ескерткіш елорда төрінде қасқайып тұр.Гүл БЕКЗАТ