Елімізде алғаш рет өткізілген ауылдық округ әкімдерінің тікелей сайлауына Жамбыл облысында «Nur Otan» партиясы атынан 31 кандидат ұсынылған. Оның 14-і қайта сайлауға түскен округ әкімдері болса, 17-і жаңа тұлғалар. Олардың ішінде 12-і мемлекеттік қызметкер, 2-і білім және мәдениет саласының маманы, 2-і ауыл шаруашылығы мен 1-і шағын және орта бизнес өкілі. Олардың қатарында ең жас әкім Ерсайын Қуандық та бар.
Ерсайын Талғатұлы небәрі 28 жасында Т.Рысқұлов ауданы Жаңатұрмыс ауылдық округінің тізгінін ұстап отыр. Өзі осы ауылдың тумасы болғандықтан, сайлауда бұқараның басым бөлігі жас әкімге қолдау білдіріп, даусын берген. Ерсайын еңбек жолын 2013 жылы Т.Рысқұлов ауданы әкімдігінің ішкі саясат бөлімі «Жастар орталығы» Ақниет ауылдық округі бойынша жастармен жұмыс бойынша ұйымдастырушысы болып бастаған.Жас маманның білімі мен білігін байқаған әкімдіктегілер кейін оны аудан әкімдігінің ішкі саясат бөліміне шақырады. Осында Ерсайын екі жыл еңбек етіп, 2014 жылы аудан әкімі аппаратының компьютерлік бағдарламаларға техникалық қызмет көрсетуші маманы болып істейді. Осылайша, сан салада шыңдалған ол 2016 жылы аудан әкімі аппаратының персоналды басқару қызметі бөлімшесінің бас маманы болады. Араға үш жыл салып дәл осы бөлімнің басшысы қызметіне тағайындалады. Мемлекеттік қызметте сатылай өсіп, барлық дәлізін көріп өткен Ерсайын осы жылдың шілде айында туған ауылына әкім болып сайлауға түсуге бел буады. Нәтижесінде, халықтың дені жас маманға сенім артып, 27 шілде күні Ерсайын Талғатұлы Жаңатұрмыс ауылдық округі әкімі қызметіне кіріседі. Ерсайын Қуандықты бүгінде жаңатұрмыстықтар жылы қабылдап отыр. Жерлестерінің жас әкімге деген сенімі мол. – Ерсайын Талғатұлын жастайынан танимыз. Мектепте зеректігімен көзге түсіп, қатарының алды болып жүрді. Есейе келе оның ел үшін еңбек еткісі келетін ерекше ықыласын байқап жүрдік. Ал ауылдық округ әкіміне сайлауға түскелі жатқанын естігенде қуандық. Себебі бізге ауылымыздың тау-тасына дейін жіті білетін әкім қажет. Әрине, жас әкімге артылар жүк ауыр. Өйткені елді мекенімізде шоғырланған мәселе көп. Десе де, бұл түйткілдердің түйінін тарқату Ерсайынның қолынан келеді деп сенеміз. Біз сол үшін де дауыс бердік. Мемлекет басшысы Қасым-Жомарт Тоқаевтың ауылдық округ әкімдерін халықтың өзіне сайлатқан саясатын қос қолдап қолдаймын. Себебі біз өзіміздің жүрек қалауымыздағы, сенім арта алатын әкімімізді таңдадық, – дейді Жаңатұрмыс ауылының тұрғыны Асылбек Әзмұратов. Ерсайын Талғатұлының өзі ауыл әкімі сайлауына ауқымды жоспармен түскенін айтады. – Туған топырағыма қызмет ету үшін осы сайлауға түстім. Ауылда ең бірінші ауызсу мәселесі өзекті. Осыған байланысты келер жылы Жаңатұрмыс ауылына ауызсу кіргізсем деп отырмын. Екінші мәселе – халық табиғи газға қол жеткізе алмай отыр. Бұйыртса, халық келер жылы көгілдір отынның да қызығын көреді. Осы екі мәселенің түйіні тарқатылғаннан кейін тұрғындардың интернетке қолжетімділігін қамтамасыз етуді көздеп отырмын. Сондай-ақ ауылішілік жолдардың да күрделі жөндеуі жоспарымда бар. Бір сөзбен айтқанда, әкімдік өкілетім біткенге дейін халық үшін аянбай тер төкпекпін, – дейді жас әкім. Иә, Ерсайын Қуандықтың мұндай қарқынын көріп біз де қуандық. Ал Жаңатұрмыс ауылына газ құбырын тарту жұмыстары бүгіннен жүйесін тауып жатқанын көріп, жанымыз жадырай түсті. Сондай-ақ ауызсу жүйесінің құрылысында да қозғау бар. Бұдан бөлек, Досымбеков көшесінің орташа жөндеу жұмыстары да күні ертең басталғалы тұр. Осындай ілкімді істерді көріп, біз де жас әкімнің әрбір бастамасына сәттілік серік болсын деп тіледік. «Жас келсе – іске» дейді дана қазақ. Ендеше Ерсайындай жас әкімнің жалынды бастамалары тек жемісті болғай!Саятхан САТЫЛҒАН, Жамбыл облысы