Қызылордада тағдырдың жазуымен ата-анасынан айырылғандар мен мүмкіндігі шектеулі жандар уақытша қоныстанатын әлеуметтік нысан бар. «Жастар үйі» деп аталатын бұл 5 қабатты үй 2012 жылы пайдалануға берілген. Мұнда кәмелет жасқа толып, жетімдер үйінен шыққан 12-23 жастағы жеткіншектер үлкен өмірге бейімделеді. Ондағы тұрғындар аталған үйдің пайдалануға берілгеніне 10 жылға жуықтаса да, «әлі күнге дейін шешілмеген мәселелері бар» дейді.
Мәселен, облыс орталығындағы барлық әлеуметтік нысандар табиғи газға қосылғанымен, аталған ғимарат тұрғындары газ баллон тұтынады. Бұл жағдайдың қауіпті екенін айтқан жастар жергілікті билік мәселемізді шешуге асықпайды деп ашынады. Ғимаратқа газ құбырлары тартылғанмен, қала әкімдігі көгілдір отынға қосуға рұқсат бермей отырған көрінеді. – Кеше өрт болды, жарылыс болды. Соның өзінде әкімдік келіп жауапты мекеме ретінде «Қандай жағдай болды?» деп сұраған да жоқ. Газдың трубалары ғимаратқа кіріп тұр. Неге оны қосуға болмайтынын түсіндірмейді, – дейді тұрғын Арайлым Сейітмұрат. Тұрғындарды толғандыратын тағы бір мәселе тұрақты тіркеуге тұра алмауында. Әлеуметтік нысанның құжаты дұрыс болмағандықтан, түрлі кедергіге тап болып жүрміз дегенді айтады. – Біз бұл үйге тіркеуге тұра алмай жүрміз. Балаларымның барлығын осы мекенжайға тіркейін десем, мына үйдің техникалық паспорты керек дейді. Бес баламды тастап, әр құжаттың соңында қалай жүремін? Үйдің сыйқы мынау, – деді көпбалалы ана Любовь Белошева. Ал «Жастар үйінің» директоры нысан қаланың балансында, сондықтан тұрғындардың тіркеуге тұруына еш кедергі жоқ дегенді айтады. Көгілдір отын мәселесі болса жуырда шешіледі деп сендірді. – 65 пәтерде қазір газ жоқ. Себебі бәрі ескірген, трубалары. Соны қазір тұрғын үй мекемесі жоба сметасын дайындап, жақын арада әр пәтерді жеке-жеке тексеріп, әрқайсысына газ тартылады, – дейді «Жастар үйінің» директоры Марат Жүсіпәлиев. Сондай-ақ аталған көпқабатты тұрғын үйдің кіреберісінде ашық жатқан тоқ көздері көп. Ата-аналар балалар тоққа түсе ме деп алаңдап отырады. Қордаланған мәселелерге қатысты құзырлы органдар дер кезінде шара қолданбаса, соңы ауыр зардаптарға әкеліп соғуы мүмкін.Ерқанат СӘРСЕНБАЙҰЛЫ, Қызылорда облысы