«Отбасы банк» жыл соңына дейін 12 мыңға жуық несие береді
«Отбасы банк» жыл соңына дейін 12 мыңға жуық несие береді
© azattyq-ruhy.kz
Кезекте тұрған 34 мың қазақстандық отбасы соңғы үш жылда Отбасы банк арқылы баспаналы болды, деп хабарлайды Елорда Инфо.
Бірінші кезекте қоныс тойын көпбалалы және толық емес отбасылар, балалар үйінің түлектері, мүмкіндігі шектеулі азаматтар, бюджеттік мекеме қызметкерлері мен мемлекеттік қызметкерлер атап өтті. Олардың дені 1986 жылдан бері баспана кезегінде тұрған азаматтар. Атап айтсақ, 34 мың кезекте тұрған азаматтың 11,1 мыңы 2019 жылы жаңа қонысқа қол жеткізді, 13,8 мыңы 2020 жылы – өз үйін сатып алды, ал 2021 жылдың жеті айында жергілікті әкімдіктердің кезегінде тұрған тағы 9,1 мың азаматқа несие берілді. Жыл соңына дейін Отбасы банк «Бақытты отбасы», «Нұрлы жер» және «Шаңырақ» пилоттық жобасы бойынша тағы 12 мыңға жуық несие беруді жоспарлап отыр. Соңғысын іске асыру үшін ҚР Ұлттық банкі Отбасы банкіне («Бәйтерек» холдингінің еншілес ұйымы) 210 млрд теңге бөлді. Оның 131,3 млрд теңгесі қазіргі уақытта тұрғын үй сатып алу мақсатына несие түрінде берілген. Әкімдіктердің кезегінде тұрғандар «5-10-20» бағдарламасының қолайлы шарттарымен жеке пәтерлер сатып алды, мұнда 5% – несие мөлшерлемесі, 10% – бастапқы жарна және 20 жыл – несие мерзімі. 78,7 млрд теңге сомасындағы қаражат қалдығы тұрғын үй іздеп жүрген қатысушылардың мақұлданған несиелік өтінімдері бойынша несиелендіруге бағытталады. Жоба бойынша 6 мыңнан астам несиелік өтінім мақұлданды. Сонымен қатар, бағдарлама қатысушылары тұрғын үйді baspana.otbasybank.kz жылжымайтын мүлік порталында ұсынылған жеке құрылыс салушылардан да, жергілікті атқарушы органдар салған тұрғын үйлерден де таңдай алады. Мемлекет жергілікті әкімдіктерге әлеуметтік тұрғын үй құрылысына 180 млрд теңге көлемінде қаржы бөлді. Бұл аймақтарда, сондай-ақ Нұр-Сұлтан мен Алматы қалаларында шаршы метр құнының бағасын бекітіп, баспана салуға мүмкіндік берді. Бөлінген қаражат толық көлемде игерілгеніне байланысты (мақұлданған несиелік өтінімдерді ескере отырып), «Отбасы банк» 2021 жылдың 9 қыркүйегінде «Шаңырақ» жобасы бойынша несиелік өтінімдерді қабылдауды тоқтатады. Сонымен бірге, baspana.otbasybank.kz жылжымайтын мүлік порталында жергілікті атқарушы органдардың кезегінде тұрған азаматтарға арналған «Нұрлы жер» бағдарламасының «несиелік тұрғын үй» бағыты бойынша өтінім қабылдау жалғасуда.