Қызылорда маңындағы ауыл тұрғындары баспанасыз қалуы мүмкін

Қызылорда облысы
©caravan.kz

Қызылорда облысындағы Қызылжарма ауылының тұрғындары әрі-сәрі күйде жүр: сот магистральды газ құбырының жанынан салынған бірнеше үйді бұзу туралы қаулы шығарған. Бұл туралы "Хабар" арнасы хабарлаған.

Алайда жергілікті тұрғындар жер телімін заң бойынша рәсімдеген. Шенеуніктер жер беру кезінде қателік жібергендерін мойындағанымен, үй тұрғызуға кеткен шығынды өтеуден бас тартып отыр.
Қызылжарма ауылының тұрғындары жеке баспана салуға арналған жер телімдерін мемлекеттен тегін алған. Газ құбырының осы жерден өтетіні үйлер бой көтергеннен кейін ғана белгілі болған.

Бағдат Исабеков он сотық жерді 2013 жылы алған. Оның айтуынша, ол жұбайы және туыстарымен бірге қаражат жинап, үш бөлмеден тұратын шағын үй салған. Бірақ қуанышы ұзаққа созылмапты: үш жыл өткеннен кейін отбасы жақын маңайдан қысымы жоғары магистральды газ құбыры жүретінін білген.

Апат болған жағдайда оның салдары ауыр болуы мүмкін. Сот үйді бұзу туралы шешім шығарды. Бағдат заңға бағынатын азамат ретінде осыған мойынсұнған.

"Қазір баратын жеріміз жоқ. Сот орындаушысы әбден мезі етті. Ол фундаментті бұзып, құрылыс қоқысын өз есебімізден шығаруымызды талап етіп отыр. Біздің үйімізді 2 миллион 300 мың теңгеге бағалады. Оның ішінде 800 мың теңге, бұл - жер учаскесінің құны. Басқа аумақтан жер берді. Бірақ үй салатын ақшамыз болмай тұр", - дейді Бағдат Исабаев.

Тағы алты отбасы да дәл осындай жағдайға тап болды. Олар бірнеше жылдан бері мемлекеттік органдар мен соттың табалдырығын тоздырып жүр.

"Біз бұл жерді 2011 жылы алдық. Фундаментін құйып, біртіндеп қабырғасын көтеріп жатырмыз. Енді тек шатырын орнату қалды. Бірақ бізге үйді бұзу керек деп жатыр. Менің күйеуім екінші топтағы мүгедек. Бір өзім ғана жұмыс істеймін. Ескі лашықта тұрып жатырмыз. Үй салу үшін барлығын үнемдеумен келдік. Жабырқап отырмыз", - дейді жергілікті тұрғын Гүлнәр Танабаева.

Aikyn.kz | Бүгінгі жаңалықтар. Әлем және Қазақстан жаңалықтары.