Тараз қаласындағы «Достық» үйінде «Этносаяси сауаттылық және этномедиация негіздері» тақырыбында семинар-тренинг өтті. Қолданбалы этносаяси зерттеулер институтының ұйымдастыруымен өткен шараға Алматы, Түркістан, Жамбыл облыстары мен аудандардың прокуратура өкілдері және ішкі саясат бөлімдерінің басшылары қатысты.
Этносаяси сауаттылықты арттыру, ұлтаралық қатынастардың ерекшеліктері мен қақтығыстар туындаған жағдайда дұрыс ақпарат беруді түсіндіруді мақсат еткен басқосудың негізгі бөлімінде сөз алған Жамбыл облысы әкімінің орынбасары Дәулет Кәрібек аталған семинардың мән-маңызына кеңінен тоқталды. – Бүгінгі жиынның бізге берері көп. Себебі ел ішіндегі татулық пен келісімді сақтау қашанда маңызды орынға ие. Қазақстанның көпұлтты мемлекет екені басты заңымыз – Конституцияда тайға таңба басқандай анық жазылған. Әлемге қонақжайлылығымен танылған қазақ елі тағдыр тәлкегіне ұшыраған сан ұлт пен ұлыстың өкілін бауырына басып, төрінен орын берді. Соның арқасында бүгінде елімізде көптеген этнос өкілдері тату-тәтті ғұмыр кешіп, бейбітшілік бесігінде тербелуде. Елбасымыз да, Мемлекет басшысы да жеріміздегі тұрақтылықтың шайқалмауын басты назарда ұстап келеді. Ұлы бабамыз Абай Құнанбайұлы да «Адамзаттың бәрін сүй, бауырым деп» деген тағылымды тәмсілін қалдырған. Сондықтан біз де бір үйдің баласындай күн кешіп, оларды тілі мен дініне қарай алаламауымыз керек. Сонда ғана бірлігі мығым, шаңырағы биік, керегесі кең қуатты елге айнала аламыз. Бүгінгі семинардың идеясы осындай асыл мақсаттарды жүзеге асырудан туындап отыр,– деді Дәулет Жамаубайұлы. Иә, жер жаһанға ынтымақтың ұйытқысы, ымыраның алтын көпірі ретінде танылған қазақ елі өзгелерге сонысымен үлгі. Бірақ мұнымен ғана тоқмейілсімей, ел ішіндегі келісімді одан әрі арттырған абзал. Ақпарат және қоғамдық даму министрлігі Этносаралық қатынастарды дамыту комитеті төрағасының орынбасары Айбек Жақсыбаевтың сөзі де осыған саяды. – Бүгінгі семинардың басты мақсаты – бабаларымыздың «бақ қайда барасың, ынтымаққа барамын» деген мысалымен астасып жатыр. Біздің аталған жиынға құқық қорғау органдары мен ішкі саясат бөлімдерінің өкілдерін шақырғанымыз тегін емес. Өйткені ұлтаралық араздықты болдырмау жолында білікті мамандармен ой-пікір алмасып, ұсыныс-тілектеріне құлақ түру құптарлық шаруа. Қандай да бір қақтығыс бола қалған кезде, ең алдымен осы қос саланың мамандары әрі қарай өршітпеуіне күш салады, – деген Айбек Маратұлы алдағы уақытта мұндай семинарларды еліміздің өзге өңірлерінде де өткізу жоспарланып отырғанын жеткізді. Екі күнге созылған іс-шараның негізгі бөлімі аяқталған соң басқосуға қатысушылар өзара екі топқа бөлініп, білікті мамандардың дәрістерін тыңдады. Айталық, «Конфликтология мен этномедиацияның базалық негіздері», «Көпшілік алдында сөйлеу дағдылары», «Ақпараттық кеңістіктегі этносаралық қатынастар» және «Этникалық топтардың өзара қарым-қатынасының әлеуметтік-психологиялық ерекшеліктері» секілді тақырыпта құнды мағлұмат беріліп, оралымды ойлар ортаға салынды.Саятхан САТЫЛҒАН, Жамбыл облысы