Бұдан былай елорданың жасыл белдеуінде атпен серуендеуге мүмкіндік туды. Онда ат спорты кешенінің құрылысы аяқталды. «Туристік маршрут» деп аталатын атпен жүруге арналған соқпақ жол қала тұрғындары мен қонақтары үшін ең тартымды орындардың біріне айналатын сыңайлы. Өйткені ат десе ішкен асын жерге қоятын азаматтар ел ішінде аз емес.
Енді жұртшылық шаһар маңындағы жасыл белдеуді атпен аралай алады. Қала әкімдігінің бастамасымен салынған соқпақтың жалпы ұзындығы 13,2 шақырымға жетеді. Қала маңындағы орман ішіндегі бұл жол атпен серуендеуге тапсырмас орын болары сөзсіз. Ол үшін қалада жылқы бағудың қажеті жоқ, тек арнайы белгіленген орынға барып, ат жалдап алсаңыз жетеді. Онда келушілерге атпен серуендеуге арналған қорғаныш киімі беріліп, қауіпсіздік ережелері үйретіледі. «Атпен жүруге арналған соқпақта қала тұрғындары мен қонақтарының қауіпсіз демалысы үшін барлық жағдай қарастырылған. Атап айтсақ, нысан аумағында 5 демалыс аймағы, автотұрақ, модульдік әжетханалар бар. Бейнебақылау камералары да орнатылған. Соқпақта атпен серуендеу қызметі жыл он екі ай көрсетіледі. Аттарды күтіп-баптау, келушілерге қызмет көрсету бағытында 15 жаңа жұмыс орны ашылды. Мұнда келушілерге табиғат аясында таза ауада атпен серуендеумен бірге атқа мінуді үйрету қызметі де ұсынылады. Жақында әлеуеттік жоба аясында денсаулығында ақауы барларға арнап иппотерапия қызметі іске қосылмақ», – дейді Нұр-Сұлтан қаласы әкімдігінің Қоршаған ортаны қорғау және табиғатты пайдалану басқармасының бөлім басшысы Қыдыр Жиенәлі. Әрине, бұл жобаға қажет аттарды күтіп-баптау да өзекті екені анық. Дегенмен серуендеуге арналған аттар «Тайтөбе» ауыл шаруашылығы коопертивінің меншігі болғандықтан, жемшөбі де аталған мекеменің мойнында деген сөз. Кооператив төрағасы Мұрат Қасымов туристерге қызметтің ерекше түрін ұсынуға бел буғандықтан, осынау жобаны қолға алыпты. «Қазір мұнда 15 ат бар. Олардың қатарын иппотерапияға арналған жылқылармен толықтыруды жоспарлап отырмыз. Сонымен қатар балаларға арнап понилерді әкелеміз. Аттардың мінезі әрқилы. Сәйкесінше, келушілердің арасында да бұрыннан атқа мініп жүргендер немесе енді үйренгісі келетіндер де табылып жатады. Олар арнайы нұсқаушының көмегімен атқа мінуді үйреніп шығады. Сондай-ақ жаз айларында арбаға, қыста шанаға жегуге арналған аттар да бар. Бір сөзбен айтқанда, кез келген талғамдағы тұтушының көңілінен шығуға барымызды саламыз. Атпен серуендеуден бөлек қоғамдық тамақтану орны, қымызхана да ашамыз», – дейді кооператив төрағасы. Жалпы, Нұр-Сұлтан қаласының жасыл белдеуі Елбасы Нұрсұлтан Назарбаевтың шешімімен 1997 жылы қаланы желден қорғау және халықтың өмір сүруіне қолайлы климат қалыптастыру мақсатында құрылды.
Оның аумағында 12,1 млн-нан астам ағаш пен бұта өседі. Сол сияқты мұнда қоян, түлкі, қарсақ, кекілік, қырғауыл және басқа да аң-құстар тіршілік етеді. Демек, енді атпен серуендеушілер осынау ормандағы жан-жануарларды жолда кезіктіруі де мүмкін деген сөз.
Ардақ СҰЛТАН