Қарағанды облысында «Ауыл Береке» дәстүрлі жәрмеңкесінің маусымы басталды. Қала тұрғындары ет пен көкөністі қолжетімді бағамен ала бастады. Қарағандыда бірінші ауылшаруашылық жәрмеңкесі 16 қазанда Global City көтерме-тарату орталығының аумағында өтті. Оған облыстың сегіз ауданынан ауылшаруашылық тауарын өндірушілер, сондай-ақ қайта өңдеу кәсіпорындары қатысты.
1 564 тонна азық-түлік жеткізді
Біраз бұрын облыстың ауыл шаруашылығы тауарын өндірушілері астанаға барып, Қарағанды ырзығын елордалықтарға ұсынып келген-ді. Міне, өткен сенбіде Global Citу-дің маңы көлікке толды. Қарақұрым адам. Әрине, қымбатшылық кімге оңай соғыпты? Базардағы баға күн санап көтеріліп барады. Бүгін 100 теңгеге алған бір бөлке наныңызға ертең 110 теңге сұраса, таңғалмайтын халге жеттік. Дүкеншіні де кінәлай алмайсыз, кімге барып шағымыңызды айтарсыз?! Сондықтан алғашқы жәрмеңкені ел тағатсыздана күткені рас. Шатырлар орналасқан іштегі алаң да ат шаптырым, ығы-жығы халықтың ыңғайы үшін кеңінен орын теуіпті. Облыс әкімдігінің баспасөз қызметі хабарлағандай, жәрмеңкеге 8 аудан қатысты. Яғни, сегіз аудандағы жүздеген шаруа қожалығы, серіктестіктер мен компаниялар бар дәмдісін осында алып келді. Ресми мәлімет бұл күні алаңға 1 564 тонна азық-түлік жеткізілгенін айтады. Мұның ішінде 185 тонна ет, 990 тонна картоп, 250 тонна көкөніс, 54 тонна сүт өнімдері, 390 мың жұмыртқа, 27 тонна балық бар. Баға – нарықтағы құннан 10-15 пайыз төмен. Мәселен, еттің келісі түлігіне қарай 1 800 теңгеден 2 200 теңге дейін бағаланды. Ал картоп, қызылша, сәбіз бен қырыққабаттың келісі 100 теңгеден, пияздың келісі 90 теңгеден саудаланды. Тауықтың он жұмыртқасын сұрпына сәйкес 220 теңгеден 320 теңгеге дейін сатып ала аласыз.Бұқар жыраудан жеткен сый
Бұқар жырау ауданы әкімінің орынбасары Арман Дардақов болды. Ауданның ауыл шаруашылығы саласына жауапты азамат жәрмеңкеге тыңғылықты дайындықпен келгенін атап өтті. – Өткенде елордадағы жәрмеңкеге барып келген соң бірден облыстық шараға дайындыққа кірістік. Біздің фермерлеріміз бұл іске ертеден жауапкершілікпен қарап келеді. Өйткені Бұқар жырау ауданы Қарағандымен іргелес жатыр. Өзге қоңсы аудандар сияқты жүктің ауыры бізге де түсетіні мәлім. Сондықтан әзірлік барысында кез келген ұсақ-түйек мәселені шет қалдырмауға тырыстық, – дейді Арман Дардақов. Бұқар жырау ауданы бұл жолы 6 тонна – сиыр, 2 тонна – жылқы, 2,5 тонна шошқа етін әкелді. Бұдан бөлек, 3 тонна құс еті, 1,5 тонна сүт өнімдері, 80 мың жұмыртқа, 70 тонна картоп пен 15 тонна көкөнісі бар. Үштөбеде ет өнімдерін шығаруды қолға алған «Экоет» компаниясының тауары да жәрмеңкеде сөреден орын алды. Жалпы, жәрмеңкеге ауданнан отыз шақты ұйым атсалысты. Облыс орталығына жақын аудандар қатарында Осакаров та бар. Аудан фермерлерінің бұл жолғы керуенінің жүгі ауыр. Аудандық ауыл шаруашылығы бөлімінің басшысы Қабылда Әбілдинов айтқандай, 30 тонна картоп – осакаровтықтардың үлесінде. – Біз «Найдоровское» шаруашылығының 30 тонна картобын, Мирный ауылындағы «Тонус» ЖШС-нің ірімшік, құрт, сары май, йогурт сынды сүт өнімдерін әкелдік. Сондай-ақ «Айдаш», «Нұртілеу», «Алшын» сияқты шаруа қожалықтары мал жеткізді. Яғни, 3 тонна – ірі қара етін, 1,5 тонна – жылқы етін, 1 тонна шошқа етін әкелдік, – деді Қабылда Әкімжанұлы.Ақтоғайда саудасын жасады
Ақтоғайлықтар да жәрмеңкенің жуан ортасынан табылды. Солардың бірі – Арна Әбдікәрімова апамыз. Ақ адал малын саудаға шығарған апайдың көңілі тоқ, атқамінер азаматтарға ризашылығы көлдей. – Жидебай ауылдық округінде тұрамын. Бүгін өзіміз баққан екі ірі қараны әкелдім. Жылда келемін. Жәрмеңке екі тарап үшін де тиімді деп ойлаймын. Қалалықтар ептеп болса да арзанға алып мәз, біз де малымызды өткізіп, ризамыз. Келісі – 1 900-2 000 теңгеден. Әдетте, алыпсатарлар еттің құнын құлатып жібереді. Жәрмеңкеге бастап келген аудан әкімдігі мен ауыл әкімшілігіне, орын бөлген облыс әкімдігіне алғысымды білдіремін, – дейді Арна апай. Апайдың сөзінің жаны бар. Күз – мал семіретін уақыт. Мал баққан ағайын осы уақта тана-торпағын, ақтылы қойын базарға апарады. Балалар сабаққа барады, қысқа отын-су, жемшөп алу керек. Бұл қысылтаяң шақты алапсатарлар ұтымды пайдаланып, дәнігіп алған. Шаруа кешқұрым сойып, түнімен жеткізген малын базардың алдында арзанға сұрайды. Қалада теуіп кірер дүкені жоқ ағайын қайтсін?! Амалы құрығаннан әкелгенін алыпсатарға тастап кетеді. Міне, жәрмеңке ортада делдалдықпен табысқа кенелген алыпсатардың жолын кесті.Жаңаарқадан қымыз бен балық жетті
Жылқысымен, қымызымен аты шыққан Жаңаарқа балығымен де жұрт аузына ілікті бұл жәрмеңкеде. Аудан орталығының тұрғыны Серік Тайтөлеуов 1 тонна балық әкеліпті. Ақтасты су қоймасынан ауланған. – Жәрмеңкеге тұрақты қатысамын. Осыдан қыс түскенше келіп тұрамын. Бұл – басы. Бүгін сазан, шортан, алабұға, мөңке әкелдім, – дейді кезекті сатып алушының сұраған балығын кірге тартқан балықшы. Мұнда балық келісі түрлеріне қарай 600-1 000 теңгенің арасында саудаланды. Қалалықтар қысқа молынан сақтайтын көкөніс – пияз. Алаңда пияз саудасы да қызды. Абайлық Ержан Ірімжановтың 6 тонна пиязы ет пісірім уақытта жоқ болды. Дүкеннен қымбатқа алып, зәрезап болған жұрт үшін жәрмеңке тосыннан тартылған сый болғанына тағы бір мәрте көз жетті осы жерде. Қалалықтар ауылдан келген арзан азық-түлікке қол жеткізген күн болды...Әдебиет БЕЛГІБАЙҰЛЫ, Қарағанды облысы