Батыс Қазақстан облысы Полиция департаменті өзін атып өлтірген 20 жастағы полицейге қатысты пікір білдірді, деп жазады «Мой город».
Оқиға бүгін сағат шамамен 07.40-та Орал қаласы полиция басқармасының ғимаратында болды.
«Ғимаратты күзету тобында қызмет атқарған 20 жастағы полиция кіші сержанты бекітілген табельдік қарумен өзін-өзі атып өлтірді. Аталған полицей ішкі істер органдарында биылғы мамырдан бері қызмет атқарды. 2019 жылдың маусымынан 2020 жылдың осы айына дейін әскери борышын өтеді,- делінген хабарламада.
«Ол қызмет бабында өзін жақсы қырынан көрсетті. Жақсы дайындалған. Тәртіпті сақтаған, жұмысқа кешікпеген. Қызмет кезінде жазаға тартылмаған», -деп хабарлады ПД.
Аталған дерек бойынша сотқа дейінгі тергеу амалдары жүргізіліп жатыр. Оқиғаның мән-жайын толық анықтау үшін қызметтік тексеру басталды.
