Санаулы күндерден соң барыс жылына аяқ басамыз. Cынаққа толы болса да, сиыр жылы бағындырған белестеріміз бен жеткен жетістіктеріміз аз болған жоқ. Енді, міне кейінге шегініс жасап, 2021 жылды қорытындылайтын кез келді. Осы орайда биыл әлемдік додаларда ел мерейін асқақтатқан жыл жеңімпаздарының үздік ондығын назарларыңызға ұсынбақпыз. Иманбек ЗЕЙКЕНОВ.
Белгілі қазақстандық диджей 2019 жылы Saint JHN-тің Roses әніне ремикс жазып, аз уақыттың ішінде әлемге танылды. Иманбектің нәтижелі жұмысы америкалық рэпердің туындысын жаңаша түрлендіріп, тыңдарманның жүрегін жаулап алды. YouTube-та миллиондаған қаралым жинап, U.S. Billboard Hot 100 рейтингінің бестігіне енді. 2020 жылы мамырда британ хит-шеруінде бірінші орынды ешкімге берген жоқ. Содан кейін Effective records атты ресейлік дыбыс жазатын компаниямен серіктестік орнатып, Roses әнін орындаған танымал әншімен ремиксті ресми түрде шығаруға келісті. 2021 жылы наурызда Иманбек қазақстандықтардың арасында алғаш болып «Грэмми» сыйлығын жеңіп алды. 63 Grammy сыйлығын марапаттау рәсімі Лос-Анджелесте өтті. Бұл марапат музыка саласында жылдың ең басты жүлдесі саналады.
Иманбек Зейкенов бүгінде Marshmello, Usher, Rita Ora, David Guetta және тағы да басқа әйгілі музыканттармен бірге ән жазып, шығармашылығын шыңдауда.
Рухия БАЙДҮКЕНОВА.
Дарынды жас әнші Беларусь Республикасының Витебск қаласында өткен «Славянский базар» байқауын жеңіп, ел мерейін асқақтатты. Әлемнің 14 елінен келген әншілер арасында Қазақстан атынан сынға түскен Рухия Байдүкенова бас жүлдегер атанса, бірінші орынды – Сербия, екінші орынды – Украина, үшінші орынды Словакия мен Әзербайжан елінің өнерпаздары алды. Елімізге олжалы оралған қазақстандық әнші «Алтын лира» және 20 мың доллар көлемінде ақшалай сыйлыққа ие болды.
Сәкен БИБОСЫНОВ.
Сәкен үшін биылғы жыл табысты өтті. Токио Олимпиадасында керемет өнерімен көзге түскен былғары қолғап шебері төртжылдықтың басты додасында қола жүлдені жеңіп алды. Бірнеше айдан кейін Түркістан өңірінің тумасы Белградта өткен әлем чемпионатында топ жарды. Биыл Аltyn Samǵaý – 2021 спорттық байқауының «Жазғы спорт түрлері бойынша үздік спортшы» (ерлер арасында) аталымына боксшы Бибосынов лайық деп танылды.
Давид ДЕГТЯРЕВ.
Токиодағы Паралимпиада ойындарында Қазақстан командасының қоржынына алғашқы алтын медальді Давид Дегтярев салды. Осылайша, ол пауэрлифтингтен ерлер арасында 54 келіге дейінгі салмақта сынға түсіп, Паралимпиада чемпионы болды. Спортшы 174 келіні көтеріп, қарсыластарын басып озды.
Осы жылы Тбилиси қаласында өткен парапауэрлифтингтен ерлер арасындағы әлем чемпионатында да 54 келіге дейінгі салмақта сынға түсіп, жеңіс тұғырынан көрінді. Қазақстандық спортшы бұл жолы 178 келі салмақты көтеріп, Токиодағы көрсеткішін жаңартты. Әлемдік додаға 68 мемлекеттен 400-ден астам спортшы қатысты.
Софья БЕРУЛЬЦЕВА.
Софья Аltyn Samǵaý – 2021 сайысында «Жазғы спорт түрлері бойынша үздік спортшы» (әйелдер арасында) номинациясын иеленді. Токиодағыда каратэші жарыстың жартылай финалына шығып, Олимпиаданың қола жүлдесін еншілегенін көпшілік ұмыта қойған жоқ. Екі айдан соң Софья каратэден Қазақстан біріншілігінде өнер көрсетіп, турнирдің алтын медалін жеңіп алды. 2021 жылғы әлем чемпионатында да Берульцева 68 келіге дейінгі салмақ дәрежесінде әлем біріншілігінің қола медалін мойнына тақты.
Жәнібек ӘЛІМХАНҰЛЫ.
Сиыр жылы Жәнібек Әлімханұлы үшін жеңісті, жемісті жылдардың бірі болды. Қазақстандық боксшы бұрынғы әлем чемпионы француз Хассан Н'Дам Н'Жикамды мерзімінен бұрын жеңіп, WBO Global тұжырымы бойынша орта салмақтағы чемпиондық титулын қорғап қалды. 10 раундтық жекпе-жек Лас-Вегаста Теренс Кроуфорд пен Шон Портердің андеркартында өтіп, сегізінші раундта аяқталды. 28 жастағы былғары қолғап шебері кәсіпқой бокста 11 кездесу өткізіп, барлығында жеңіске жеткенін де айта кетейік.
Төлепберген БАЙСАҚАЛОВ.
Қазақстандық актердің еңбегі Сочи кинофестивалінде жоғары бағаланды. Актер әлемдік деңгейдегі марапатын 2021 жылғы Х Russian British Sochi International Film Festival & Awards мерейтойлық фестивалінде «От» фильмінде сомдаған рөлі үшін алды. Сонымен қатар «От» фильмі Лос-Анджелестегі Asian World Film Festival негізгі бағдарламасында, 32-Сингапур кинофестивалінде де ұсынылды. Кейін танымал қазақстандық актер Asian World Film Festival кинофестивалінде режиссер аталған фильмдегі жұмысы үшін «Үздік ер адам рөлі» жүлдесін иеленді. Айта кетейік, бұл фестиваль голливудтық және азиялық ойын-сауық индустриясы арасындағы байланысты нығайтады. Биыл байқауға 20-дан астам елде түсірілген 30 фильм қатысты.
Қазақстан футзал құрамасы.
Литвада өткен әлем чемпионатында жер жаһанды таңғалдырған футзалдан Қазақстан ұлттық құрамасын жыл жеңімпаздарының қатарына қостық. Жартылай финалда әлем чемпиондары Португалия құрамасынан пенальти сериясында жеңілген құрамамыздың ойынын жанкүйерлер бас бармақпен бағалады.
Күні кеше Ұлттық олимпиада комитетінің ұйымдастырған байқауында «Жылдың үздік командасы» атағын Қазақстан футзал құрамасы еншіледі. Биыл футзалшылар әлем чемпионатының жартылай финалына шығып, төртінші орынға табан тіреген болатын. Соған қарап, Қазақстанда футболдан гөрі футзалда көп ілгерілеу барын бағамдауға болады. Жанкүйерлер футзалшыларымыздан келер жылы өтетін Еуропа чемпионатынан да жүлде күтеді.
Айта кетейік, Еуропа чемпионатының финалдық сатысы 2022 жылы 19 қаңтар мен 6 ақпан аралығында Нидерландының Амстердам және Гронинген қалаларында өтеді.
Динара СӘДУАҚАСОВА.
Қазақстандық шахматшы, әйелдер арасында халықаралық гроссмейстер Динара Сәдуақасова Испанияда өткен әлем чемпионатының жеке сынында қола жүлдені жеңіп алды. Испаниядағы әлем чемпионатына әлемнің 12 елінен ең мықты әйелдер құрамасы қатысты. Чемпионатта Жансая Әбдімәлік, Динара Сәдуақасова, Меруерт Камалиденова және Гүлмира Дәулетова секілді Қазақстан құрамасы шахмат тақтасында өнер көрсетті. Командалық есепте Қазақстан құрамасы үздік төрттікті қорытындылады.
Әмір ЗӘКІРОВ.
Қазақстандық биші Әмір Зәкіров Польшада өткен әлем чемпионатында 1-орын алды. Әлем чемпионаты әлемнің түкпір-түкпірінен келген мыңнан аса талантты бишілердің басын қосты. Ол ақтық сында 16 брейк-дансерлер қатарында өнер көрсетті. Бұл спорт түрі 2024 жылы Парижде өтетін Олимпиада ойындарының бағдарламасына енді.
Әмір, бұдан бөлек 2021 жылдың қыркүйегінде Бельгияда өткен JBL Unbreakable ірі халықаралық брейк-данс турнирінде де жеңіске жеткен. Финалда ол бельгиялық Майти Джимммен бақ сынасты. Сондай-ақ Әмір ТНТ арнасындағы «Танцы» шоуының 3-маусымының қатысушысы, Қазақстан чемпионы және брейктен республика құрамасының мүшесі, көптеген Ресей және Еуропа чемпионатында ел мерейін асқақтатты.
