Алматылық «Қайрат» пен Қазақстан құрамасының қорғаушысы Нұралы Әліп «Зенит» сапында алғашқы жаттығуын өткізді.
Ресейлік клуб жуырда ғана Дубайда өтетін оқу-жаттығу жиындарына келді. 22 жастағы қазақстандық футболшы аталған команданың жаттықтырушылар штабының бақылауында болады.
Таңертеңгілік тапсырма ретінде ойыншылар алдымен тестілеуден өтті. Нұралы Әліп Иван Сергеев, Дмитрий Чистяков және Андрей Мостовоймен бірге екінші топқа түсті. Тестілеу нәтижесі бойынша футболшылар оқу-жаттығуда қандай тапсырмалар орындайтыны белгілі болды.
Кешкі уақытта «Зенит» жаттығу ойынын өткізді. Оған қазақстандық қорғаушы да қатысты. Қысқы медтексерісті сәтті өткізген Нұралы Әліп 19 қаңтарда «Эмирейтске» қарсы ойында петербургтік команда қатарында алаңға шығуы мүмкін.
Айта кетейік, оқу-жаттығу жиыны 25 қаңтарға дейін жалғасады.
