Қазақстандық кәсіпқой боксшы Данияр Елеусінов (11-0, 6 КО) әлеуметтік желідегі парақшасында кімдермен жекпе-жек өткізгісі келетінін жазды.
Елеусінов кәсіпқой рингте орта салмақта WBC тұжырымы бойынша әлем чемпионы Эррол Спенспен (27-0, 21 КО) және WBO белбеуінің иегері Теренс Кроуфордпен айқасуға дайын екенін жеткізді.
«Басты мақсатым – орта салмақтағы осы екі чемпионмен шаршы алаңда кездесу. Менің олардан еш жерім кем емес. Қайта жеңіске жетуге мүмкіндігім жоғары», – деп жазды Елеусінов инстаграм парақшасында.
Айта кетейік, Данияр Елеусінов елордадағы Жақсылық Үшкемпіров атындағы Jekpe Jek сарайында өткен кәсіпқой бокс кешінде Аргентина боксшысы Хуан Эрнан Леаоны жеңіп, "IBO" титулын иеленген болатын.
