Жамбылда оқушының тырнағын алғаны үшін мұғалім қызметтен қуылды. 5-сыныптың оқытушысы Перизат Мырзабекова тазалықты талап етемін деп басы дауға қалып отыр. Ақбұлым ауылы Б.Бесбаев атындағы мектеп-гимназиясынан шыққан шу министрлік мінберіне дейін жетіп, қазір арнайы тексеріс жүріп жатыр. Ал «баламның тырнағын түбінен қанағанша алған» деп шағымданған оқушының ата-анасы кейіннен ұстазды кешіргенін айтып, бұл жағдайды талқыға салған жұртты сабырға шақырды. Алайда қоғамның пікірі қақ жарылып, біреулер баласының тазалығына қарамаған ата-ананы сөксе, екіншілері мектеп мұғалімін кінәлады. Тіпті, мектеп директорын да қызметтен босату керек дегендер табылды.
Әңгіменің әлқиссасын әріден бастасақ, мектептегі бұл жағдай 24 қаңтар күні болған. Алайда әлеуметтік желі қолданушылары тырнағының түбі қызарған баланың суретін 26 қаңтар күні желіге жүктеп, аудандық білім бөлімінен бастап, еліміздің Білім және ғылым министрі Асхат Аймағамбетовке дейін белгілеп тастады. Осылайша, тұтанған дау түстен кейін өрши түсіп, әуелі облыстық Білім басқармасы тексеріс жүретінін айтса, кейін тіпті мұғалімді бір күнде қызметінен алып тастағаны туралы ресми хабар таратты.
«Жамбыл облысы әкімдігінің Білім басқармасы Б.Бесбаев атындағы мектеп-гимназиясында болған жағдайға байланысты төмендегіні хабарлайды:
«Жамбыл ауданы білім бөлімі тарапынан аталған мәселе шұғыл зерделеніп, кінәлі тұлғаларға қатаң түрде тиісті шаралар қолданылды. Нақты айтсақ, Еңбек кодексінің 49-бабы 3-тармағына сәйкес, жұмыс берушінің бастамасы бойынша мұғаліммен еңбек шартын бұзу ұсынысы жолданды. Ұсынысқа сәйкес, мұғалім жұмысынан босатылды. Ал мектеп директорына қатаң сөгіс түріндегі тәртіптік шара қолданылды», – длінген басқарма мәлімдемесінде.
Мұндай шешімнен кейін бұлқынған бұқара басылғандай болды. Алайда тағы бір топ «Неге мектеп директорына сөгіс түрінде ғана жаза берді. Алты айдан кейін сөгісті алып тастауға болады. Оған қоса, мектеп директоры екі жерде жұмыс істейді екен. Мұндай басшы қайдан баланың тәрбиесіне қарасын? Негізгі кінәлі сол адам. Оны да қызметтен алу керек» деп бас көтерді. Осылайша, екінші екпін алған шағымдар легіне Жамбыл аудандық білім бөлімі жауап берді.
«Шайқорық» орта мектебінің бұрынғы директоры зейнеткерлік жасқа толуына байланысты Еңбек кодексіне сәйкес жұмыстан босатылды. «Шайқорық» орта мектебінің бос директор лауазымына конкурс БАҚ-қа жарияланған. Кадрлық резервте тұрған үміткерлерге де ұсыныс жолданған. «Шайқорық» орта мектебінің директоры орынбасарлары өз өтініштері бойынша мектеп директорының лауазымдық міндеттерін қоса атқарудан бас тартты. Өндірістік қажеттілікке байланысты тез арада шешу жолдарын табу үшін «Шайқорық» орта мектебінің аймағына жақын орналасқан мектеп директорларына Еңбек кодексінің 111-бабы 2-тармағы 2) тармақшасына сәйкес қызмет көрсету аймағын кеңейту бойынша уақытша болмаған жұмыскердің міндеттерін атқару ұсынылды. Осыған сәйкес, Б.Бесбаев атындағы мектеп-гимназиясының директоры Г.Сыздыковаға қызметтік міндеттерді уақытша қоса атқару жүктелді. Бүгінде Г.Сыздыкова тек Б.Бесбаев атындағы мектеп-гимназиясынында директор лауазымында жұмыс атқарады», – деді білім бөлімі ресми хабарламасында.
Осылайша, Б.Бесбаев атындағы мектеп-гимназиясының директоры Г.Сыздыкованың да «Шайқорық» орта мектебіндегі қосымша жұмысы бір-ақ күнде тоқтатылды. Бірер сағатта болған осындай ауыс-түйістен кейін шенділер шулаған жұрт басылады деп күткен болар. Алайда «Бір ауданда бір мектепті басқаратын директор табылмады дегенге кім сенеді? Биліктің тапқан айласы осы болды ма?» деген жазбалар желіде желдей есті. Бұған жауаптылар «тексеріс өтеді» деп қана жауап қатты.
Әрине, тексеріс тобының жұмысына араласуға құқылы да, құлықты да емеспіз. Бізді алаңдатып отырғаны – тазалықты талап етіп, қызметтен қуылған Перизат Мырзабекованың тағдыры. Және жұрт жаппай мұғалімді кінәламас бұрын неге оның мұндай қадамға барған себебіне үңілмеді? Жалпы, мұғалім оқушының тырнағын алып беруге міндетті ме? Баланың тазалығына неге ата-анасы қарамаған?
Біз Перизат Мырзабековаға қанша хабарлассақ та, ол болған жағдайды бастан-аяқ баяндап беруден бас тартты. Өз-өзіне келу үшін уақыт керегін айтты. Сондықтан күйзелісте отырған жас маманды одан әрі мазаламадық. Алайда Баймырза Бесбаев атындағы мектеп басшылығы әлеуметтік желідегі парақшаларында жағдайды түсіндіруге тырысты.
«Жамбыл облысы Жамбыл ауданы Баймырза Бесбаев атындағы мектеп-гимназияның 5 б-сынып жетекшісі Перизат Мырзабекова 2022 жылғы 24 қаңтар күні сыныбында оқушылардың тазалығын тексеру барысында оқушының өскен тырнағын көріп, қайшымен өзі алып тастаған, бірақ асығыс алынғандықтан, баланың тырнағы жарақаттанып қалған. Мұғалімнің әрекеті артық кеткен, бірақ ол осындай шулы жағдай болатынын ойламаған. Дегенмен де мұғалім өз кінәсін мойындап, ата-анасынан үйіне барып кешірім сұрады. Ата-анасы да мұғалімнің жағдайын түсініп, кешірімін берді», – деді ресми мәлімдемеде.
Оқу орнының басшылығы жағдайды осылай баяндап отыр. Алайда Перизат Мырзабекованың әріптестері баланың тырнағының түбі алғаш алғанда қызарып тұрмағанын айтады. «Бәлкім, оқушы қолын жуғаннан кейін солай қызарып кетті ме?» деген болжамдарын да жасауда. Одан бөлек, Перизатты әріптестері өте білікті де тәрбиелі маман ретінде суреттейді. Сондай-ақ ауылдағы жас отбасы екен. Ал ең басты мәселе – мектеп мұғалімдері «оқушының тырнағын алғаны үшін әріптесімізді қызметтен қуса, енді ата-ана да, балалар да басқа шығатын болды» деген уайыммен отыр.
Әрине, біз біреудікі дұрыс, әлде бұрыс деуден аулақпыз. Алайда бәріміз ұстаздың алдынан өттік. Көненің көздерінің қайсысынан сұрасаң да «Біздің кезде тырнағымыз түгілі, мұғалім шашымызды алып тастаса да үндемейтінбіз. Себебі өз тазалығымызға өзіміз жауапты едік. Оны әке-шешеміз де түсінетін. Оқушы үшін мұғалімнің сөзі де, талабы да заң болатын» деген пікірді айтады. Ал Перизат Мырзабековаға қолданылған жазаны ойласақ, шынында бүгінгі оқушыны да, ата-ананы да басындырып алған жоқпыз ба? Бәлкім, «Мұғалім мәртебесі» дегенде олардың айлығын емес, беделін көтеру керек шығар? Бұдан Білім және ғылым министрлігі бір сабақ шығарады деп сенеміз...
