Щучинскте модульді гаражда өрт шығып, алты бірдей газель маркалы автокөліктер жанып кетті, - деп хабарлайды Aikyn.kz тілшісі.
Жайсыз оқиға бүгін таңертеңгі 08:08 шамасында болған. Контейнер түріндегі модульді блок гараж ғимаратында тұтанған өрт 4 металл контейнерді түгелдей қызыл жалынға орап, жалпы аумағы 290 шаршы метрді шарпыған.
Өрт таңғы 08.47-де ауыздықталып, шамамен 09.22-де толықтай сөндірілген.
«Тілсіз жаудың салдарынан «газель» маркалы 6 көлік түгелімен өртеніп кетті. Абырой болғанда зардап шеккендер мен құрбан болғандар болған жоқ. Қазір өрттің себептері анықталып жатыр. Өртті сөндіруге жеке құрамның 20 сарбазы мен 4 өрт сөндіргіш техника жұмылдырылды», - дейді Ақмола облысы төтенше жағдайлар департаментінің баспасөз қызметінен.
Құтқарушылар облыс тұрғындары мен қонақтарына өрт қауіпсіздігі ережелерін қатаң сақтауды ескертті.
