37 мектепте спортзал, 70 мектепте асхана жоқ
Жалпы, облыста бүгінде 480 білім беру мекемесі жұмыс істеп тұрса, онда 244 299 оқушы білім алады. Міне, осы мектептердің 37-і спортзалсыз, 70-і асханасыз отыр. Яғни, 37 мектептің балалары денешынықтыру пәні дегенді білмей, 70 мектепте оқушылардың сабақ арасындағы үзілісте тамақтануына мүмкіндік жоқ. Спортзалы жоқ мектептердің көшін Жамбыл ауданы бастап тұр. Мұнда Ы.Алтынсарин, Қапал, Қоңыртөбе, Қостөбе, Рахат, Шайдана сияқты 9 білім беру мекемесінде оқушылардың жаттығатын орны қаралмаған. Екінші орында Байзақ ауданы тұр. Онда Пушкин, Королевка, Маметова, Аққия, Ақтөбе, Багара, Үшбұлақ, Еңбек секілді 7 мектепте спортзал болмаса, Т.Рысқұлов пен Меркі аудандарын бірге қосқанда 10 мектепте денешынықтыру сабағын өткізу мүмкіндігі жоқ. Ал Шу ауданындағы 4 мектептің, Сарысу ауданындағы 3 мектептің оқушылары спортпен тек күн жылынғанда айналысады. Оның өзінде балалар шаң көтеріп, далада доп қуаламаса, жаттығуға қажетті арнайы құрылғылар қойылмаған. Балалардың спортпен шұғылдануына тиісті жағдай жасай алмай отырғандардың қатарында Талас, Мойынқұм аудандары мен Тараз қаласы да бар. Енді асхана мәселесіне келсек, мұнда Жамбыл мен Т.Рысқұлов аудандары тағы көш алдында. Жамбыл ауданында №3, Ы.Алтынсарин, Жұма, Қапал, Қоңыртөбе, Қостөбе, Рахат, Шайдана, Қызыл-Дихан, Қызыл таң сияқты 10 мектеп асханасыз отырса, Т.Рысқұлов ауданында да №2, Малдыбай, Әубәкіров, Мұратбаев, Тасшолақ, Сөгеті, Байтелі, Мамай-Қайыңды, Шопақ-Қайынды, Көкарық атты мектептерде асхана қаралмаған. Бұдан кейінгі кезекте Байзақ пен Талас ауданында – 9, Жуалы мен Шу ауданында – 8, Меркі ауданында – 6, Сарысу ауданында – 5, Мойынқұм мен Қордай ауданында 2 мектепте оқушылардың тамақтанатын орны болмай тұр. Тіпті, Тараз қаласындағы №58 жекеменшік мектепте де асхана атымен жоқ.Мамандар не дейді?
Облыс орталығындағы мектептердің өзінде спорт зал мен асхананың болмауы терең ойға қалдырады. Енді бұл мәселеге мамандар не дейді? – Мектептің спорт залы барлық білім беру мекемесінде болуы керек. Мектепте спорт зал және оған қосалқы жайларды пайдалану нормаларының сақталуына бақылауды әрбір тексеру кезінде жүргіземіз. Облыстағы жағдайдан Білім басқармасынан бастап облыс әкіміне дейін хабардар. Себебі бұл мәселе әр жиында көтеріледі. Тексеріс жүргізілгеннен кейін әр мекемеге хат та жолданады. Біздің тараптан бұл түйткіл назардан тыс қалған емес. Алайда мәселе қаржыға келіп тірелетіндіктен, қолымыздан келер амал болмай тұр. Ал сапаны қамтамасыз ету бойынша денешынықтыру сабағының кабинетте өтуі ешбір стандартқа сай келмейді, – дейді Жамбыл облысының Білім саласында сапаны қамтамасыз ету департаменті басшысының орынбасары Жасұлан Атенов. Байқасақ, денешынықтыру сабағын сыныпта өткізу ешбір стандартқа сай келмейді екен. Сонда 37 мектеп осы күнге дейін қалай күнелтті? Әлде мұнда денешынықтыру сабағы мүлде болмай ма? – Бұл мәселені кезең-кезеңімен шешуге тырысып жатырмыз. Былтыр бір мектепке спорт зал салсақ, биыл Жаңаталап орта мектебіне қажетті залға сметалық құжаттарын рәсімдеп, құрылыс бөлімі арқылы облыстық Білім басқармасына өткіздік. Қаржы бөлінсе, құрылысты бастап кетеміз. Ал асханаға келер болсақ, біздің ауданда 5 мектепте асхана жоқ. Ашығын айту керек, ауылдағы мектептер шағын, 20 шақты бала ғана тамақтанады. Сондықтан асханаға қатысты жуық арада құрылыс жүреді деп айта алмаймыз. Өйткені аталған мектептерге жапсарлас құрылыс жүргізу мүмкін болмағандықтан, бәлкім арнайы контейнерлер қоюды ойлап отырмыз, – дейді Сарысу ауданы білім бөлімінің басшысы Ильяс Алшынбайұлы.Қазынаға қол жайып отыруға болмайды
Негізі, мектептерінде спорт залы мен асханасы жоқ аудандардың дені осы жауапты айтады. Бар мәселе қаржыға келіп тірелетіндіктен, олар қазынаға қол жайып отыр. Ал асхананың орнына контейнер қою – ақылға сыймайтын дүние. Олай дейтініміз, алдыңғы жылы дәретхананы барлық мектептің ішіне орнату туралы тапсырма берілгенде бірқатар аудан оның орнына мектеп жанына контейнер қойып, «қызыққа» батырған болатын. Қойылған контейнерлер қыста суық, жазда ыстық болып, ойланбай істеген тірлік сан соқтырған еді. Енді, міне Сарысу ауданы «асхананы контейнермен алмастырамыз» деп тағы таңғалдырды. Бәлкім, оқушы саны аз мектептер бұған дейін спортзал мен асхана мәселесіне бас қатырғысы келмеген шығар. Алайда бір бала болса да, онда ел ертеңі саналатын ұрпақ тәрбиеленіп жатыр ғой. Бала тәрбиесіне бұлай атүсті қарауға бола ма? Оған қоса, облыстық Білім саласында сапаны қамтамасыз ету департаменті басшысының орынбасары Жасұлан Атенов мұндай жағдай санаға да, стандартқа да сыймайтынын ашып айтып отыр.Әрине, қаржы болмаса құрылыс жүргізу қиын екені белгілі. Алайда жылда түлектер мектебіне тарту жасап жатқанда осы мәселені мектеп директорлары неге көтермейді? Ауылға арка орнатып, мектептің сыртын қоршай бергеннен гөрі бірнеше сыныптың түлектері бірігіп шағын спорт зал, кішігірім асхана салып берсе, ешкім қарсы болмас. Түптеп келгенде, өткен жылдан бері өңірде жанданған «Жомарт түлек» жобасын неге осы жаққа бағыттамаймыз? «Жомарт түлек» жобасы жиналып той-тойлап, ас ішіп, суретке түсумен өлшенбейді ғой. Қалталы түлектердің басын құр қосып, бір-біріне мақтау айтқаннан гөрі олар білім алған мектебі үшін бір спорт залын салып беріп жатса, мұндай игілік ел есінде, жұрт жадында қалатыны анық. Сондықтан бұл мәселені жауаптылар таразыға салып, барлық жаққа тиімді бір шешімді табады деп сенеміз. Әйтпесе, өркениет көшіне ілесіп, үздік 30 мемлекеттің қатарына кіреміз деп жүргенде білім беру мекемелеріміз ешбір стандартқа сай келмей жатқаны ешкімге абырой әкелмейтіні хақ.
Жамбыл облысы