Мәжіліс депутаттары – «Nur Otan» партиясы фракциясының мүшелері Павлодарда ерекше балаларды тәрбиелеп отырған аналармен және Кемеңгер ауылының Красноармейск аграрлық-техникалық колледжінің жастарымен кездесті.
Бұған дейін Парламент Мәжілісінің депутаттарымен кездесу онлайн форматта ұйымдастырылып, онда мүмкіндігі шектеулі балаларды тәрбиелеп отырған ата-аналар мүгедектік санаттарын қайта қарауды, заңнамаға түзетулер енгізуді және жеңілдікпен дәрі-дәрмектер алуды қамтамасыз етуді талап еткен болатын.
Енді 18 ақпанда Парламент Мәжілісінің депутаттары – «Nur Otan» партиясы фракциясының мүшелері Айгүл Нұркина, Анатолий Бойчин, Вери Ким «Кедергісіз келешек» партиялық жобасы аясында ерекше қажеттілігі бар балаларды тәрбиелеп отырған аналармен кездесіп, олардың проблемалары мен ұсыныстарын тыңдады. Әйелдер дәрі-дәрмектерді жеткізудегі қиындықтар, техникалық және ақшалай қаражаттың жетіспеушілігі туралы айтып, денсаулық сақтау жүйесіне сенімсіздік білдірді. Кейбір жағдайда диагноз дұрыс қойылмаған, ал ақыл-есі кем балалар санаты мүгедектіктің дәстүрлі топтарымен бір деңгейге қойылмаған.
Кездесу барысында аналар келесідей мәселелерді көтерді:
– мүмкіндігі шектеулі балалар үшін мүгедектік санаттарын қайта қарау; мүмкіндігі шектеулі балаларды тәрбиелеп отырған аналар үшін зейнеткерлік жас деңгейін төмендету; ақыл-есі кем балалардың проблемалары бойынша;
– диагнозы күрделі мүмкіндігі шектеулі балаларға барлық қажетті құралдарды ұсыну: матрастар, сорғыштар, тыныс алу құралдары, оларды ата-аналардың өздері сатып алуға мәжбүр;
– мүмкіндігі шектеулі балаларға сапалы тауарлар сатып алу мақсатында қажетті қаражаттың кепілдік берілген сомасын ұлғайту. Құралдарды сатып алу порталының жұмысы жетілдірілмеген, оның балама нұсқасын ашу немесе оны пысықтау қажет;
– мүмкіндігі шектеулі балалардың мүмкіндігін ескере отырып, тұрғын үй бағдарламаларына қатысу үшін тұрғын үй заңнамасына өзгерістер енгізу – зейнетақы аударымдары жоқ және тағы басқа;
– жеке көмекшілерге сағаттық күтімге байланыстырмай 2 АЕК жалақы мөлшерінде еңбекақы белгілеу. 1-2-топ мүгедектері мен бала кезінен мүмкіндігі шектеулі балаларға күтім жасайтын адамдар үшін зейнеткерлік жасты әйелдер үшін 55 жасқа дейін және ерлер үшін 60 жасқа дейін төмендету. Сондай-ақ баланың мүгедектігіне әкеп соқтырған медициналық қателік жіберген медицина қызметкерлері туралы сұрақтар көтерілді.
Барлық мәселелер тыңдалып, ерекше бақылауға алынды. Депутаттардың айтуынша, барлық мәселені бір күнде шешу мүмкін емес, көп проблема егжей-тегжейлі зерттеуді қажет етеді.
Күн тәртібіне сәйкес, мәжілісмендер Павлодар ауданы Кемеңгер ауылының жастарымен де кездесу өткізді. Ел Президенті партия съезінде сөйлеген сөзінде қаңтардың қайғылы оқиғаларында, оның ішінде жастардың әлеуметтік-экономикалық бейімделуі мәселелерінде елеулі олқылықтар бар екенін атап өтті. Сондықтан жастармен, әсіресе ауылдық жерлерде тұратын, оның ішінде жұмыссыздармен өзара қарым-қатынас орнату қажет.
Кемеңгер ауылының Красноармейск аграрлық-техникалық колледжінде (КАТК) 890 студент оқиды. Бүгінде ол отандық ауыл шаруашылығы кадрларының нағыз ұстаханасына айналған. Бұл – Павлодар облысының көне оқу орындарының бірі, бірақ сонымен бірге ең заманауи білім ошағы. Мұнда инновациялар, дуальді оқыту қарқынды енгізілуде, халықаралық тәжірибе алмасу жүріп жатыр. Сондықтан колледжді бітірген барлық жас мамандарға сұраныс жоғары. Колледж ашылғалы 47 жыл ішінде 12 мыңнан астам ауыл шаруашылығының маманы даярланды.
Кездесу барысында депутаттар студенттердің тұрмысымен, білім алу, демалыс жағдайларымен танысты. Сондай-ақ жатақханадағы температуралық режимді тексерді. Себебі бұған дейін әлеуметтік желілерде жатақхананың суықтығын айтып, шағымданған болған. Делегация жатақхананы аралап, бөлмелердегі температураны өлшеді. Бірақ тексеріс кезінде температураның қалыпты екеніне көз жеткізді. Одан кейін олар колледж қазандығына барып, жұмыс кестесін тексерді.
Студенттер арасында спортпен айналысатындар көп болғанымен, колледждің өз спорт кешені жоқ екен. Бұл жастардың спортпен шұғылдануына көп қиындық туғызады. Ауыл әкімінің айтуынша, спорт кешенінің жобалық-сметалық құжаты дайын, құжат биыл облыс әкімдігіне жіберілуі тиіс.
Сондай-ақ студенттер шәкіртақы мәселесін де көтерді. Қазір колледждегі стипендия мөлшері 21 000 теңгені құрайды. Кездесу соңында мәжілісмендер Красноармейск аграрлық-техникалық колледжі студенттерінің ұсынысын ескеріп, оның жүзеге асырылуын бақылауға алатын болып келісті.
