Жыл басынан бері 9 бала үйінен кетіп қалған
Биыл қаңтар айында өткен «Жасөспірім» жедел-профилактикалық алдын алу іс-шарасы басталған алғашқы төрт күн ішінде тәртіп сақшылары түнгі сағат 23.00-ден кейін заңды өкілдерінің еріп жүруінсіз тұрғын-жайдан тыс жерде жүрген 30 жасөспірімді анықтап, олардың ата-аналарын Әкімшілік құқықбұзушылық туралы кодекстің 442-бабының 2 бөлімімен әкімшілік жауапкершілікке тартты. Одан басқа, кәмелетке толмаған балаларын тәрбиелеу және оған білім беру, оның құқықтары мен мүдделерін қорғау жөніндегі міндеттерін орындамаған 6 ата-ана анықталып, оларға қатысты ӘҚБтК-нің 127-бабымен әкімшілік хаттамалар жасақталып, жинақталған іс-құжаттар заңды шешім қабылдау үшін сотқа жолданған. – Үйінен ұдайы кетіп қалатын жасөспірімдер де бар. Мәселен, бір жеткіншек үйінен 3 рет кетіп, қайта оралғысы келмеген. Қаңғыбастыққа салынған жасөспірімнің ата-анасы әкімшілік жауапкершілікке тартылды. Онымен қоса ол ішкі істер органдарының есебіне алынды. Жалпы, жасөспірімге қай уақытта да ата-аналар жауапты болуы керек деп есептеймін, – дейді ювеналды полиция бөлімшесінің бастығы, полиция майоры Азамат Қарамұратов. Осындай оқиғаларды болдырмас үшін ювеналды полиция өкілдері ата-аналардан балаларына көбірек көңіл бөлуді және де балаларының қызығушылықтары мен бос уақытта немен шұғылданатынынан хабардар болуды ескертсе де бала жоғалу оқиғалары азаяр емес. Айталық, биыл жыл басынан бері үйінен 9 бала қашып кеткен. Сегіз бала аман табылып, серуендеп кетуге жалғыз шыққан 9 жастағы баланың денесін туған-туыс, тұрғындармен бірге іздеген төтенше жағдай департаменті қызметкерлері Перетаска каналынан тапты. Өз еркінше қыдыруға кетіп отбасын да, жергілікті тұрғындар мен полиция қызметкерлерін де әуреге салғандармен бірге адасып қалу, балалықпен ойнап кету оқиғалары да жиі кездеседі. Балаларын таба алмай 102 нөміріне қоңырау шалу соңғы екі жылда көп тіркеліпті. Былтыр облыста 51 бала үйлерінен шығып кетіп, оларды іздеуге арнаулы құрылым жұмылдырылған. Атырау облысы Полиция департаменті Жергілікті полиция қызметі басқармасы Ювеналды полиция тобының ерекше тапсырмалар жөніндегі аға инспекторы, полиция подполковнигі Орынгүл Көшқалиеваның айтуынша,көбіне өз бетінше қыдыруға шығатындар тобына 2 -10 жас аралығындағы балалар кіреді. Олар әдетте мұндай әрекетті қасақана жасамайды. Ал қасақана өз бетімен қыдыруға ниет білдіретін топтарға келетін болсақ олар 11-18 жас аралығындағылар. –Жасөспірімдердің жоғалуы мен түрлі қылмыстарға ойланбай ұрынатынын ескеріп, өз тарапымыздан жауапты құрылымдарға кәмелетке толмағандарды отбасындағы тәрбиеге аса мән беруге, балалар ойнайтын алаңдарды көбейтуге, жазда суға түсетін орындардың ересектердің бақылауымен ашуға, білім беру ұйымдарында сабақтан тыс тәрбиелік шараларға тарту, ұжымдар арасында бала тәрбиесіне ата-ананың тікелей жауапты екенін жеткізетін кездесуді жиі өткізуге, мәдени, спорттық шараларға қатысуды тегін ұйымдастыруға, тіпті мүмкіндік болса бұрынғы кеңестік тәрбиені жаңа бағытта жаңдандырып қабылдауды қайта қарауға ұсыныс білдіремін, – дейді Орынгүл Көшқалиева.Отбасындағы берекесіздіктен балалар зардап шегіп жатыр
Жуырда Атырау облысының кәмелетке толмағандардың істері жөніндегі мамандандырылған ауданаралық сотының өткен жылы атқарған жұмыстары сараланған брифинг өтті. Аталған соттың төрағасы А.Ташенова мен судья Ғизатолла Отарұлының қатысуымен өткен брифингте айтылған деректерге сүйенсек, өңірде кәмелет жасына толмағандармен жұмыс істеуде көптеген кемшіліктер бар. Сотқа келіп түскен талап арыздардың дені ата-аналық құқығынан айыру немесе шектеу жөнінде. Әкелікті анықтау және алимент өндіру мен алимент мөлшерін өзгерту, азайту туралы арыз тіптен көп. Баланың тұрғылықты жерін анықтау мен баламен кездесу уақытын белгілеу жөнінде талап арыздардың көптігі бала құқығының аяқасты болуына себеп болып отыр. Статистикалық мәліметтерге сәйкес есепті мерзімде сот өндірісіне түскен 36 істің ішінде кәмелет жасқа толмаған 11 адамға қатысты 9 қылмыстық іс бар. Осы 9 істі тарқатып айтсақ, ұрлық, тонау, бұзақылық пен денсаулыққа қасақана ауырлығы орташа зиян келтiру тәрізді деректер тіркеліпті. Қылмыс жасағандар 14 пен 17 жас аралығында болған.Бас бостандығынан шектелгендердің арасында кәмелетке толмағандар да бар. Бұл деректердің барлығы да алдымен отбасындағы жағдайлардың балаға әсер етуінен болып отырғаны сөзсіз. Ата-ана арасындағы түсінбеушілік пен ажырасудың салдары балаға тиіп отыр. Былтыр сот өндірісіне 388 тұлғаға қатысты әкімшілік құқықбұзушылық іс түсіп, барлығы қаралып, аяқталған. Брифингте спикерлер ата-ананың немесе басқа да заңды өкiлдердiң кәмелетке толмаған балаларды тәрбиелеу мен оқыту жөнiндегi мiндеттердi орындамауы алаңдатып отырғанын айтты. Бесіктен белі шықпай жатып алкогольдік ішімдіктерді ішу немесе қоғамдық орындарға масаң күйде келу, түнгі уақытта ойын-сауық мекемелерінде немесе тұрғынжайдан тыс жерде болу дерегі де жоғары көрсеткіште тұр.Атырау облысы