Павлодар облысында WhatsApp мессенджеріндегі чатта әдепсіз сөздері бар дыбыстық хабарламалар жіберген ер адам жауапқа тартылды.
Pavlodarnews.kz-тің хабарлауынша, Успен аудандық сотында ер адамға қатысты әкімшілік іс қаралған.
Іс материалдарына сәйкес, азамат 2022 жылғы 2 сәуірде Успен ауылындағы 245 қатысушысы бар WhatsApp мессенджеріндегі топтардың біріндегі хабарландыруларды оқып, әдепсіз сөздері бар дыбыстық бірнеше хабарлама жіберген.
«Ол осы топқа қатысушыларға қатысты адамның қадір-қасиетіне нұқсан келтіретін сөздер айтқан. Осылайша ӘҚБтК-нің 434-бабының 1-бөлігінде (ұсақ бұзақылық) көзделген әкімшілік құқық бұзушылық жасаған», – деп хабарлады облыстық соттың баспасөз қызметінен.
Сот қаулысымен ер адам кінәлі деп танылып, оған 5 тәулікке әкімшілік қамауға алу жазасы тағайындалды. Шешім заңды күшіне енген жоқ.
