Нұр-Сұлтандағы Орталық коммуникациялар қызметінде өткен брифингте Бас прокуратураның 1 Қызмет бастығының орынбасары Елдос Қилымжанов Қаңтар оқиғасына қатысты тергеу жұмыстарына қатысты тың деректерді жария етті.
25 наурызда Алматыдағы «Анна» қару дүкенінен мылтық ұрлап, әуежайға, полиция департаментіне және Алмалы аудандық полиция басқармасына шабуыл жасаған Ш. есімді азамат ұсталған.
Сондай-ақ 5 қаңтарда топ болып бірігіп «ҚазАэроНавигация» ғимаратын басып алып, әуежайдың ұшу-қону жолағын сөндірген Н. есімді азамат тұтқындалған.
«Жамбыл облысында ПД бастығының экс-орынбасары ұсталды. Ол қызметтік қаруды сақтауға жауапты бола тұра, арсеналдың бір бөлігін тонауға жол берді. Қылмыскерлердің қолында 610 қару болды, бүгінге дейін тек 206-сы табылды», – деді Бас прокуратураның 1 Қызмет бастығының орынбасары Елдос Қилымжанов.
Ал 4 сәуірде арнайы прокурорлар Алматы әкімдігінің алдындағы жаппай тәртіпсіздіктер ұйымдастыруға қатысы бар Алматы облысының 10 тұрғынын ұстаған.
Оған қоса арнайы қызмет өкілдері Шымкентте жаппай тәртіпсіздікті қаржыландыру және 5 қаңтарда Алматы әкімдігі мен ПД-ға шабуылдағандарға арматура, Молотов коктейлі құралдарын жеткізуді ұйымдастыру күдігі бойынша С. есімді азаматты қамауға алған.
«Жамбыл облысында 5 ұйымдастырушы, 11 арандатушы және тәртіпсіздікке қатысқан 140 белсенді қатысушы анықталып, өңірдегі ұйымдасқан қылмыстық топтардың 2 көшбасшысы қамауға алынды», – деп мәлімдеді Елдос Қилымжанов.
Сонымен қатар Алматы, Жамбыл, Қызылорда облыстары мен Алматы әуежайының ПД және ҰҚК ғимараттарын тастап кету фактілері бойынша тергеу жұмысы жалғасып жатыр. Аталған органдардың басшылары күдікті деп танылған.
