Елордада көпқабатты үйге құлап кеткен кранның иесі жазаға тартылды
Елордада көпқабатты үйге құлап кеткен кранның иесі жазаға тартылды
Нұр-Сұлтан қаласында тұрғын үйдің алтыншы қабатына кранның құлауына жол берген жауапты ұйым әкімшілік жазаға тартылды. «Әлеуметтік желіге мониторинг жүргізу барысында Нұр-Сұлтан қаласы Есіл ауданы Ұлы дала даңғылы мен Қабанбай батыр даңғылының қиылысында орналасқан бас мердігері «Bazis Construction» ЖШС саналатын құрылыс нысанында автокранның өнеркәсіптік қауіпсіздік қағидаларын бұзғаны туралы бейнеролик анықталды», - деген жауап келді Төтенше жағдайлар министрлігі өнеркәсіптік қауіпсіздік комитетінен. Хабарламада айтылғандай, қалалық өнеркәсіптік қауіпсіздік департаментінің инспекторлары оқиға орнына барып, болған жағдайдың мән-жайын тексерген. «Автомобиль кранының операторы (XZJ5281JQZ50K) қауіпсіздік техникасын бұзып, объектінің қызыл сызығының аумағынан тыс жүк тасымалдағаны анықталды. Мемлекеттік инспекторлар автомобиль кранының меншік иесі «Бас техника» ЖК иесіне түсіндірме жұмысын жүргізді. Сонымен қатар қауіпсіз жұмыс істеу қағидасын бұзғаны үшін ҚР ӘҚБтК 298-бабының 1-бөлігі бойынша мердігерге айыппұл салынып, әкімшілік жазаға тартылды», - дейді аталған ведомстводан. Кеше Нұр-Сұлтан қаласының Сығанақ көшесінде орналасқан тұрғын үйдің алтыншы қабатындағы пәтердің терезесіне автокран құлаған еді.