Степногорда полицей қайтыс болған адамның телефонынан 38 606 теңге ұрлап алған

полицей
© time.kz

Степногор  қалалық сотында жергілікті полиция басқармасының 34 жастағы қызметкері Ермек Рамазановтың үстінен қылмыстық іс қаралып жатыр. Полицейге 38 606 теңге ұрлады деген айып тағылып отыр. Бұл ақша жұмыс орнында кенеттен көз жұмған 65 жастағы автомобиль шеберханасының қызметкерінен жоғалып кетті, – деп хабарлайды «Время» басылымы. 

2021 жылғы 8 қарашада «Қамқор» СТО қызметкері Борис Астафьевтің жүрегі соқпай қалды. Сол күні оқиға болған жерге полиция шақыртылған. Жедел-тергеу тобының құрамында анықтаушы Рамазанов та болған. Туыстарына хабарлау үшін ол марқұмның телефонын пайдаланған. Кейін криминалистке смартфонның жоғалып кетуі мүмкін екенін айтып, өзімен бірге алып кетуін өтінген.

Содан кейін тергеу мәліметтері бойынша, анықтаушы Астафьевтің банк шотындағы ақшаны ұрлау бойынша жоспар құрған. Ол көз жұмған ер адамның смартфонындағы қосымшаға кіріп, 38 606 теңге жатқанын көрген. Осыдан кейін Рамазанов әріптестеріне бұл ақшаны Астафьевтің әйелі жұбайын жерлеу шығындарына жұмсауы үшін шешіп беруді сұраған.

Полицейлер оның айтқанына алданып, ақшаны карталардың біріне аударуға келісіп, Ермекке 40 мың теңге қолма-қол ақша береді. Рамазанов бүкіл соманы өз қажеттілігіне жаратып үлгереді.

 

Бірақ Астафьевтің қызы ақшаның жоғалып кеткенін біліп қояды. Осылайша,  қысқа ғана тергеуден кейін ақшаны анықтаушының ұрлағаны белгілі болды. Тергеу оның әрекеттерін «ақпараттық жүйеге заңсыз кіріп, телекоммуникация желілері арқылы берілетін ақпаратты өзгерту арқылы жасалған ұрлық» деп атады.

Бұл қылмысты жасағаны үшін полицейге 3 мың АЕК-ке дейін айыппұл, 1 200 сағатқа дейінгі түзеу жұмыстары немесе мүлкін тәркілей отырып, 5 жылға дейінгі мерзімге бас бостандығынан айыру немесе шектеу жазасы күтіп тұр.

Aikyn.kz | Бүгінгі жаңалықтар. Әлем және Қазақстан жаңалықтары.