Instagram парақшасында Halyk Bank әрбір қазақстандыққа 500 000 теңге және одан артық көлемде ақша төлеуге міндеттелгені туралы ақпарат тарады. Төлемді алу үшін сілтеме бойынша өтіп, онлайн-платформада тіркелу қажеттігі талап етілген. Қаржы министрлігі бұл ақпаратты жоққа шығарып, алаяқтардың ісі екенін ескертті.
“Желіде Қазақстан азаматтарына 500 000 теңге төлейтін жобаға қатысуы туралы ақпарат таратылды. Жазбаға Қазақстан Премьер-Министрінің орынбасары – Қаржы министрі Е.Жамаубаевтың суреті қоса берілген. Ақпараттың Қаржы министрлігіне, сондай-ақ Премьер-Министрдің орынбасары – Қаржы министрі Е.Жамаубаевқа қатысы жоқ. Бұл – жалған ақпарат. Жұртшылықтан жалған ақпарат таратпауды және тек ресми ақпарат көздеріне сенуді сұраймыз”, – деп хабарлады ведомство.
Сондай-ақ ведомство түрлі төлемдер төленетіні туралы күмәнді хабарламаларға сенбеуге шақырды.
“Әдетте бұл желі қолданушыларының жеке мәліметтері мен қаражатын иемденуді мақсат еткен алаяқтардың ісі болады”, – делінген хабарламада.
