– «Қазақстан барысына» дейін қандай турнирлерде үздік атандыңыз?
– Бұған дейін көптеген дүбірлі додаларда бағымды сынадым. Оның ішінде 2019 жылы «Әлем барысы» абсолюттік әлем чемпионатында күміс жүлдегер атандым. Азия чемпионы атандым. Республикалық «Үздіктердің үздігі» атты 8 балуанның арасындағы турнирдің жеңімпазы болдым. Сол сияқты самбодан халықаралық дәрежедегі спорт шеберімін.
– Шынында бұл жолғы жеңісіңіздің жөні бөлек. Осы додадағы сіз үшін ең мықты қарсылас кім болды? Кіммен белдесу қиын болды?
– Биылғы «Қазақстан барысына» еліміздің әр аймағынан 5000 үміткерден іріктеліп, әр облыстан 2 балуаннан 36 балуан ақтық айқасқа жолдама алды. Осы 36 балуанның әрбірі «сен тұр, мен атайын» дейтін шетінен мықты жігіттер. Оның бірі мықты, екіншісі әлсіз деп айтуға келмейді. 36 балуанның арасында Әлем, Азия чемпионаттарында және осы «Қазақстан барысында» топ жарған балуандар бар. Мәселен, Мұхит Тұрсынов «Қазақстан барысы» жобасының 2014 жылғы жеңімпазы болса, Ерасыл Қажыбаев осы турнирде екі рет күміс жүлде алған. Ақтық сын үшін белдескен қарсыласым Ғалымжан Қырықбай да былтырғы додада күміс жүлдегер атанған. Финалда жолымыз түйіскен Нұрдәулет Жарылғапов та әлсіз қарсылас емес. Былтыр «Белбеу» күресінен әлем чемпионы атанып, «Қазақстан барысында» қола жүлдеге иелік еткен.
– Мықты спортшының жетістігі тынымсыз еңбек пен талапшыл жаттықтырушыға байланысты. «Қазақстан барысын» баптаған бапкерлеріңіз туралы білгіміз келеді...
– Мұнда мені бала күнімнен баптап, бүгінге дейін қазақша күрестің қыр-сырын үйретіп жүрген Болатбек Кенеевтің есімін асқан құрметпен атап өткім келеді. Өзім туып-өскен Қармақшы ауданы Жосалы кентіндегі қай баланы алсаңыз да бір бүйрегі қазақша күреске бұрып тұрады. Олардың дені Әділбек Серікбаевтай ағайдың тәлімін көргендер. Мен де сол кісіден күрестің әліппесін үйрендім деп айта аламын. Қызылорданың күрес мектебін жоғары деңгейге жеткізуге күш салған Садық Мұстафаев та бапкер ретінде қалыптасуыма еңбек сіңірді.
Спортшының жетістігі тынымсыз жаттығу мен білікті бапкерден бөлек ата-анасына, жанкүйерлеріне де байланысты екенін айтқым келеді. Осы турнирдегі әр белдесуімде қызылордалықтардың қолдауын сезіндім. Сондықтан да бұл менің ғана емес, тұтас Сыр еліне, тілеулес жандардың баршасына ортақ жеңіс деп білемін.
– Алдағы жоспарыңызбен бөлісе кетсеңіз? Екі дүркін, үш дүркін «Қазақстан барысы» атанып, жанкүйерлеріңізді қуантқыңыз келмей ме?
– Әрине. Қазіргі таңда алтын белбеу мен тайтұяқты Сыр жұртшылығына екі-үш мәрте тарту үшін дайындыққа қайта кірістім. Сондай-ақ «Әлем барысының» алтын белбеуін де тағынып, жанкүйерлерімді тағы бір қуантсам деймін.
– Әңгімеңізге рақмет! Жеңісті сәттеріңіз көп болсын!
Ербақыт ЖАЛҒАСБАЕВ, Қызылорда облысы