Басында абдырағаным рас. Бірақ өмір болған соң барлығын да көру керек. Әрі мен үшін бұл жаңа тәжірибе еді. Көп ойланбай «Брависсимо» театрына бардым. Есту, сөйлеу қабілетінен айырылған адамдармен жұмыс істеу оңай дей алмаймын. Бастапқыда түсінісу қиындау болды. Менімен бірге сурдоаудармашы жұмыс істеді. Жүре келе артикуляцияның, қимыл-әрекеттердің көмегімен байланысқа түсе бастадым. Арасында параққа жазамын. Сөйтіп, жұмысымызды бастап кеттік. Бұл 2019 жыл еді», – дейді Татьяна.Осылайша, Татьяна «Брависсимо» саңыраулар қоғамы жанындағы қимыл-әрекет театрында волонтер ретінде үш жылдай тегін жұмыс істейді. Осы кезде қимыл-әрекет, пантомимо элементтері, музыка, биге негізделген қимылдармен қойылым қойған театр біраз шыңдалады. Сөйтіп, «Брависсимо» театры есту қабілетінен айырылған адамдар арасындағы VІІІ республикалық Клоунада шоуында бас жүлде жеңіп алады. Татьянаның көркемдік жетекшілігімен сахналанған қойылым арқылы театр қалыптасу тарихындағы алғашқы жеңіске жетеді. Кейін театр Ақтөбе қаласына барып өнер көрсетті. Ол жерде көрерменге «Махаббат жүрегі» қойылымы ұсынылды. Қазір репертуарын «Махаббат жүрегі», «Тыныштық», «Дружба», «Забота» сынды сахналық қойылымдармен толықтырған театр көптеген сайыста жүлде алып жүр. Жақында ғана театр ХV батыс аймақтық «Не подчиняйся глухоте, а подчини ее себе» конкурсында өнер көрсетіп, көрермен көзайымына айналды.
Татьянаның айтуынша, мұндай өнер фестивальдары ерекше адамдар үшін аса қажет.
«Көп жағдайда мүмкіндігі шектеулі адамдар қоғамнан тыс қалып жатады. Біз олардың ішкі жан дүниесіне үңіле бермейміз. Шын мәнінде, сөйлеу, есту қабілетінен айырылғанымен, мұндай адамдардың ішкі түйсігі керемет дамыған. Олардың арасында керемет таланттар бар. Олар музыканы естімесе де, жүрекпен сезініп әдемі билейді. Енді біреулері қолдың қимыл-қозғалысы арқылы ән айтады. Кей таланттарымыз пантомимо, клоунадаларда ерекше өнер көрсетеді. Біз әртүрліміз, бірақ қоғам алдында бәріміз тең құқылымыз. Қойылымдарымыз арқылы қоғамға осы идеяны жеткізгім келеді», – дейді Татьяна Капуова.Қазір театр 18-24 аралығындағы 10 жасты біріктіріп отыр. Сахнада өнер көрсетіп, көрерменге ерекше эмоция сыйлайтын әртістер өнерден тыс уақытта еңбек етеді. Мәселен, театрдағы қыздардың барлығы дерлік тігін цехында жұмыс істейді. «Олар сахналық киім тігумен айналысады. Оның ішінде ұлттық киімге тапсырыс көп түседі. Мұның өзі – үлкен әлем. Себебі қыздарымыз киімді жай ғана тігіп қоймай, әр оюдың тарихын зерттейді, ізденеді. Осылайша, түрлі ұлттың дәстүрімен танысады. Ерлер жағы қаланы көгалдандыру саласында жұмыс істейді.
Шыны керек, бұған дейін мүмкіндігі шектеулі адамдардың арманы туралы ойланып көрмеппін. Енді байқап қарасам, олардың барлығы да отбасын құрып, бала сүюді армандайды екен. Мен үшін ерекше сырлы әлемді ашқан «Брависсимоның» барлық әртісі өмірлік серігін кездестіріп, отбасылы болып кетуіне шын жүректен тілектеспін», – деді бізбен қоштасарда Татьяна Капуова.
Баян ЖАНҰЗАҚОВА, Атырау облысы