Елімізде пәтерді жалға беру құны екі есеге қымбаттап кетті

Елімізде пәтерді жалға беру құны екі есеге қымбаттап кетті

Екі күн ішінде баспананы жалға беру ақысы екі есеге өсіп кетті. Сарапшылар бұған ел ішіндегі ақпараттық дүрбелең себеп болғанын айтады, деп хабарлайды Астана арнасы.

Елімізде пәтерді жалға алу құны күрт қымбаттады. Жалға бағаны бір түнде көтеріп жіберген. Бүгінде үйді жалға беретін сайттарға кірсең, жағаңды ұстайсың. 1 бөлмелі пәтерлердің құны 200.000 теңгеден басталады, ал 2 бөлме үшін орташа есеппен 400.000 теңге сұрайды.

Пәтерді сату-сатып алуды жарнамалайтын сайт өкілдері болса, бұл ақпаратты жоққа шығарды.

"Пәтерге деген жоғары баға тамыз айының соңы мен қыркүйек айының басында белгіленген болатын. Бұның бәрін ақпараттық дүрбелең ушықтырып жіберді", - дейді сарапшы Алина Буравцева.

Елордада пәтерді жалға беру ақысы өскен. Екі күннің ішінде 120-150 мың теңгеге беріліп жүрген баспана қазір 2 есе қымбаттапты. Мұны сарапшылар сұраныстың артуымен байланыстырды.

"Сұраныстарға байланысты жалдамалы пәтерлердің құны 20-25 пайызға баға көтеріліп отыр. Біз сұраныстың артуы мен төмендеуіне тәуелдіміз. Нарықтық бағадан бас тарта алмаймыз. Соған сай жұмыс істейміз", - дейді жылжымайтын мүлік бойынша сарапшы Айгүл Момынтай.

Экономистер жылжымайтын мүлікті жалға беру ақысының құбылуына алаңдаулы. Бұл пәтер сағалап жүргендердің қалтасына салмақ болады дейді. Дегенмен жауаптылар алаңдауға негіз жоқ дейді. Баға бақылауда екенін айтып, халықты сабырға шақырды. Бұл уақытша құбылыс екенін ескертті.

Aikyn.kz | Бүгінгі жаңалықтар. Әлем және Қазақстан жаңалықтары.