Үшінші мегаполисте басымдық берілген салалардың бірі – білім. Мектепке дейінгі мекемелерді салу бойынша мәселе алдағы 3 жылда шешімін табады. 577 нысан салынып, 3-6 жас аралығындағы балалар 100 пайыз балабақшамен қамтылатын болады. Бүгінде үш ауысымдық мектептер саны азайды. Қаладағы 242 525 оқушы 203 мемлекеттік мектепте білім алады. Биылдың өзінде 33 білім ошағы пайдалануға берілді. Қала әкімі өңірдегі осы және өзге де жетістіктерге тоқталды. Қала басшысына жиынға қатысқан 300 ден аса тұрғынның 42-сі сұрақ жолдап, тиісінше жауаптарын да алды. «Әрбір азаматтың талап-тілегі ескеріледі, мәселенің күрделілігіне байланысты орта және ұзақ мерзімде қаралатын болады», – деді Мұрат Әйтенов.Айта кетейік, тұрғындарды негізінен тұрғын үй, жол, жарық, ауызсу, тағы да басқа әлеуметтік мәселелер мазалайды. Одан бөлек, азаматтар жеке мәселелермен де шағымданды. Ал Еңбекші ауданының әкімі Досбол Есілбек ауданға қарасты 35 елді мекендегі жеке сектор мен көпқабатты үйлердің жылыту маусымына дайындығын, аулалар мен саябақтарды абаттандыру, көшелер мен жолдардың жөнделген тұстарын баяндады. Еңбекші ауданында 313 200-ден астам халық тұрады. Аудан бюджеті 2017 жылдан бері 11 есеге ұлғайып, 17,5 млрд теңгеден 78,5 млрд теңгеге өскен. Негізгі қаржы көзі – ауыл шаруашылығы мен орта және ірі кәсіпкерлік субъектілері.
«Қазіргі таңда ауданда 3 өндірістік аймақ жұмыс істейді. Олардың қатарында «Оңтүстік», «Ордабасы» индустриалды және «Оңтүстік» экономикалық аймақтары бар. Ал жаңадан салынып жатқан «Жұлдыз» экономикалық аймағына инженерлік инфрақұрылым жұмыстары жүргізілуде», – деді аудан әкімі. Экономикалық аймақтың құрылыс жұмыстары біткенде мұнда 60 ірі заманауи кәсіпорын ашылмақ. Нәтижесінде, 100 млрд теңге инвестиция тартылып, 3000 жұмыс орны құрылады.Денсаулық сақтау саласы толық компьютендірілді Қала әкімі Мұрат Дүйсенбекұлының халықпен есепті кездесуі одан әрі Қаратау ауданында жалғасты. Онда қала бюджетінің 2017 жылдан бері 4 есеге өсіп, 133 млрд теңгеден 583,5 млрд теңгеге артқаны айтылды. Бұл қаржы әлеуметтің әлеуетін арттыруға, сондай-ақ маңызы бар нысандардың салынуына, денсаулық, білім, ауылшаруашылық сияқты түрлі салаларды дамытуға жұмсалған.
Мәселен, биыл денсаулық сақтау саласы 100 пайыз компьютерлік техникамен қамтылған. Қазіргі таңда қалада 44 емхана, 4 көпсалалы аурухана, 22 компьютерлік томография, 14 магниттік резонанс томографиясы бар. «Материалдық-техникалық базаны жаңғырту бойынша биыл жоспарды 79,2%-ға орындадық. 6 емхана мен ПЭТ/КТ сәулелі терапия, 800 орындық университет клиникасын салу алдағы күндердің еншісінде. Бұдан бөлек, 200 орындық перинаталдық орталық ашу да жоспарлануда», – деді шаһар басшысы Қаратау ауданы тұрғындарымен кездесу барысында.Қаладағы осындай игі істерді баяндаған Мұрат Дүйсенбекұлы одан соң Қаратау ауданының әкімі Р.Мүлкемановтың жыл басынан бергі атқарған жұмысын тыңдады. Аудан әкімі негізінен аймақтағы маңызды мәселелердің бірі инфрақұрылым жүйелерінің тартылуы, баспанамен қамту, арнайы спорт және балалар алаңының салынуы жайында баяндама жасады.
Қаратау ауданында қос бірдей индустриалды аймақтың құрылысы қызу жүргізілуде. Аталған аймақтарда 35 жоба жүзеге асырылып, 2000-ға жуық жұмыс орны ашылатын болады. «Қазіргі кезде «Тассай» индустриалды аймағының аумағы толық жұмыс істеп тұр. Мұнда бүгінге дейін 20 жобаны іске қосып, нәтижесінде 1 500 адамды жұмысқа орналастырдық. Жыл соңына дейін тағы 8 нысанды іске қоссақ, 885 жұмыс орны ашылады деп күтіп отырмыз», – деді Р.Мүлкеманов.Бұдан бөлек, аудан әкімінің айтуынша, «Бозарық» тамақ өнеркәсібі индустриалды аймағынан 21 тамақ өнеркәсібі, ал «Агроиндустриалдық» аймағынан 14 өндірістік жылыжай кешенін ашу жоспарланған. Қазір инфрақұрылым құрылысы жүргізілуде. Сондай-ақ аудан әкімі Рахымберді Мүлкеманов ауданды сапалы ауызсумен қамту жұмыстарына кеңінен тоқталды.
«Өткен жылы сапалы ауыз сумен қамту бойынша «Көмешбұлақ», «Асар», «Шымсити»-ден «Достық»-қа дейінгі әлеуметтік нысандар бойынша және «Нұртас» елді мекеніне кестемен, «Тұран», «Асар-2» елді мекендеріне тасымалмен, жалпы саны 6 магистралды жобаның құрылысы аяқталып тапсырылған болатын. Биыл «Нұртас су жинақтағыш» әлеуметтік нысаны бойынша 3 елді мекенде атап айтқанда, «Қайнарбұлақ», «Сайрам» және «Жаңақұрылыс» аумағындағы «Ақтас-2»-де құрылыс қарқынды жүргізілуде, жыл соңына дейін 1-еуі тапсырылса, 2 жоба жаңа жылға өтпелі», – деді аудан басшысы.2023 жылдың соңына дейін 5 нысанның құрылысы жүргізілмек. Бүгінде Қаратау ауданы тұрғындарының 91 пайызы сапалы ауызсуды тұтынады. 2023 жыл соңына қарай, аталған нысандардағы құрылыс жұмыстары толық аяқталса, жергілікті халық сапалы ауызсумен 100 пайыз қамтылады деп күтілуде. Инфрақұрылым күн тәртібінен түспейді Айта кетейік, үшінші мегаполистегі өзекті мәселенің бірі – кейінгі қосылған елді мекен инфрақұрылымы. Қала күннен күнге кеңейіп, тұрғындар саны артқан сайын жылуы мен жолында, газы мен жарығында арагідік түсініксіздіктер белең алып тұратыны рас. Себебі әу баста мұнша тұрғынға жоспарланбағандықтан, электр желілері мен құбырлар жүктемені көтере алмай жатады. Сондықтан қала билігі халық сұранысы бойынша бар күшті осынау салаға жұмсап отыр. Мәселен, Солтүстік-батыс аймағындағы жалпы 39 көшенің 22-сі – асфальт, 17-сі – тасжол. Биыл Өріс тұйығы, Талас, Бектау жалпы 2 көше жөндеуден өткізілді. Өзекті көшесі пайдалануға берілді. Ал 3 көше жарықтандырылды. Шағынауданды сапалы интернетпен қамтамасыз ету мақсатында талшықты оптика желісі орнатылған. Жалпы, Солтүстік-батыс шағынауданындағы 181 түтінде 6 355 адам тұрады. Тұрғындар сапалы электр қуатымен, табиғи газ және ауызсумен толық қамтылған. Ал 37 150 тұрғыны бар Абай ауданына қарасты Қатынкөпір шағын ауданындағы 107 көшенің 75-і – асфальт, 32-сі – тасжол. Биыл Спатаев, Ирисмет ата, Айбек, Ясауи атындағы жалпы 4 көше пайдалануға берілді. 18 көше жарықтандырылды. Сапалы интернетпен қамтамасыз ету мақсатында базалық станция орнатылған. Сондай-ақ 27 090 тұрғыны бар «Самал-3» шағынауданындағы 63 көшенің 24-і – асфальт, 39-ы – тас жол. Биыл Б.Момышұлы (жалғасы 1,2,3,4) Құрманғазы, Қайсенов, Өскенбай, Ерубаев, Аманжолов атындағы және Баршын сынды 6 көше жөндеуден өткізілді. Шағынаудан тұрғындары ауыз су, табиғи газ, және сапалы электр қуатымен толық қамтамасыз етілген. 14 көше жарықтандырылған. Сапалы интернетпен қамтамасыз ету мақсатында талшықты оптика желісі жүргізілген. Осылайша, бүгінде қаланың барлық аумағына кезең-кезеңімен инфрақұрылым жұмыстары жүргізіліп жатыр.
Шымкент қаласы