Қазақстан Республикасы Бас прокурорының орынбасары Ж.Өмірәлиев «Прокуратура туралы» Заңның 31-бабының тәртібімен үндеу жасады.
Құзырлы орган өкілінің айтуынша, әлеуметтік желілерде 24 және 25 қазанда орталық алаңдарда жергілікті атқарушы органдармен келісілген митингілерге қатысу туралы жалған хабарламалар мен арандатушылық үндеулер орналастырылуда.
Ал бұл ақпарат шындыққа сәйкес келмейді.
«Бұл күндері осы жерлерде қандай да бір митингілер өткізу келісілмеген.
Республика күнін мерекелеуді ескере отырып, тек ресми мәдени-бұқаралық іс-шаралар өткізілетін болады.
Осыған байланысты осы жалған хабарламалар мен жарияланған акцияларды ұйымдастыру және оларға қатысу, сондай-ақ оларға шақыру заңсыз болып табылады.
Өкінішке қарай, митингілерді немесе өзге де бейбіт жиналысты өткізудің заңды тәртібін бірнеше рет түсіндіруге қарамастан, оны бұзу орын алуда» делінген Үндеуде.
Бас прокуратура өкілі бұл тәртіп 2020 жылғы 25 мамырда қабылданған «Қазақстан Республикасында бейбіт жиналыстарды ұйымдастыру және өткізу тәртібі туралы» Заңмен регламенттелгеніне назар аударған.
Сәйкесінше, Заң талаптарын бұза отырып өткізілетін митингтерді, шерулерді, жиналыстарды немесе демонстрацияларды ұйымдастыру және оларға қатысу (3-баптың 3-тармағы) заңсыз болып табылады және 25 тәулікке дейін қамаққа алумен Әкімшілік құқық бұзушылық туралы кодекстің (бұдан әрі - ӘҚБтК) 488-бабы бойынша жауаптылыққа әкеп соғады.
«Мысалы, 15 қазанда Алматы қаласында заңсыз митингке қатысуға шақырған осындай үндеулер үшін А. деген азаматқа сот ӘҚБтК-нің 488-бабының 7-бөлігі бойынша 15 тәулікке қамаққа алу түрінде әкімшілік жаза қолданды.
Осындай құқық бұзушылық үшін 12 қазанда Алматы облысында азамат Д. 15 тәулікке қамаққа алынды.
