Шымкент әуежайында «Ордабасы» футбол клубының ойыншыларын қала тұрғындары, клуб жанкүйерлері, бір топ спорт сүйер қауым, әскери оркестрмен салтанатты түрде қарсы алды. Футболшыларды әуежайдан күтіп алған жанкүйерлер «Әл-Фараби» алаңындағы қала әкімдігі басшылық құрамының қатысуымен салтанатты жиынға жиналды. Футболдан ҚР кубогын салтанатты тапсыру рәсімінде сөз алған Шымкент қаласы әкімінің бірінші орынбасары Шыңғыс Мұқан «Ордабасы» футбол командасының ойыншыларын Шымкент қаласының әкімі Мұрат Дүйсенбекұлының, Шымкент қаласының тұрғындарының, «Ордабасы» жанкүйерлері атынан футболдан 2022 жылғы Қазақстан кубогымен құттықтады. «Құрметті футболшылар, қала әкімі финалды стадионда тамашалап, матчтың соңына дейін болып, өздеріңізге қолдау көрсетті. Жалпы «Астана-Аренада» болған шымкенттік жанкүйерлер сіздерге қолдау көрсетіп, шабыт берді. Алдағы жылы өтетін чемпионатта алғашқы үштікке іліне беріңіздер. Келер жылы Шымкент қаласы Еурокубок ойындарын қабылдайтын болады. Бұл тек «Ордабасы» клубының ғана емес, бүкіл Шымкент қаласының жеңісі, үшінші мегаполис спортының жеңісі! – деді ол.
Міне, араға 11 жыл салып, Қазақстан кубогын Шымкентке алып келген «Ордабасы» командасына қала тұрғындары осылайша ерекше құрмет көрсетіп, оларды жігерлендірді. Қала әкімінің орынбасары Мақсұт Исахов та барша жанкүйерлерді, футбол командасын жеңісімен құттықтады. «Біздің жігіттер табандылық көрсетіп, жанкүйерлерге қуаныш сыйлап отыр. Финалдық кездесуде алаңға бірінші минуттан шыққан 11 футболшының жетеуі – қазақстандық спортшылар екенін мақтанышпен айта аламыз. Ал клубтағы 25 ойыншының 17-сі – өзіміздің, Шымкенттің түлектері. Барлығы – клубтың тәрбиеленушілері. Кубок тағы да құтты болсын», – деді қала әкімінің орынбасары. Ал «Ордабасы» клубының президенті Бауыржан Абдубайтов бұл жеңісте барша қала тұрғындарының үлесі бар екенін жеткізді. «Баршаларыңыздың қолдауларыңыз біздің футболшыларға күш-жігер берді», – деді. Жүздерінде қуаныш табы сезіліп тұрған футболшылар Астанада жүрсек те, жерлестеріміздің қолдауын сезіндік деп риза болысты.«Ордабасы» футбол клубының капитаны Самат Шәмші Қазақстан кубогын қала әкімінің бірінші орынбасары Шыңғыс Жұмабекұлына салтанатты түрде табыстады.
Шымкент қаласы