Орталықтың бірінші бөлімшесі Әл-Фараби ауданы, Дулати көшесі, 36 мекенжайында орналасқан. Ал екіншісі осыдан тура бір жыл бұрын ашылған Әл-Фараби ауданы, Дулати көшесі, 160 мекенжайындағы бөлімше. Онда зейнет жасындағы азаматтарға 4 сағатқа дейінгі арнаулы әлеуметтік қызметтер және өзіне қызмет көрсетуге мүмкіндігі жоқ жалғызбасты қарттарға 8 сағатқа дейін жартылай стационар жағдайда әлеуметтік-сауықтыру қызмет түрлері көрсетіледі. Қаратау ауданы, 194 квартал, Жібек жолы көшесі, 22/1 учаскесінде орналасқан үшінші бөлімше жартылай стационарлық жағдайда қабылдауға арналған. Мұндағы қызметкерлер тәуліктің күндізгі 4 сағат уақытында қарттарға екі ауысым бойынша қызмет көрсетеді. Мұнда жоғары дәрежелі терапевт, невропатолог, инемен емдеу дәрігері тексеру жүргізеді. Одан бөлек, қазыналы қарттарымыз бильярд, теннис, садақ ату, ART терапия, тренажерлық қызмет түрлері, бассейн, массаж, әсемдік жасару терапиясы, караоке зал (ән айту), хореография, йога, еңбек терапиясы, денешынықтыру бөлмелерінде қызығушылығына қарай шұғылданады. Бөлімшенің екі ауысымда 150 ардагерді қабылдауға мүмкіндігі бар.
Бүгінде жыл басынан бері Шымкент қаласындағы «Белсенді ұзақ өмір сүру» орталықтары 14 мыңға жуық зейнеткерге қызмет көрсеткен. 2019 жылы орталықта көрсетілетін қызметің 15 түрі ғана болған, қазір оладың саны 33-ке жеткен. Атап айтсақ, физиотерапия кабинеті мен сенсорлық терапия, тұз кеніші (солева шахта), АRT терапиясы (сурет салу өнері, саз қолөнері, құмтерапиясы), ерлерге арналған еңбек терапиясы (шеберханасы), караоке зал (ән айту), әсемдік жасару терапиясы және бассейн бар.
«Белсенді ұзақ өмір орталығы» мекемесі мамандарының мәлімдеуінше, бүгінде орталықта 715-ке жуық зейнеткер арнаулы әлеуметтік қызмет түрін алып жатыр. Қызмет алушылар орталыққа келгенде міндетті түрде бірінші дәрігерлік тексеруден өтеді. Айта кетейік, орталыққа келу үшін жеке кәулік пен зейнеткерлік куәлігінің көшірмесі, медициналық картаны толтырса жеткілікті. Осылайша, құрмет демалысына шыққан азаматтар қоғамдық, мәдени шаралардан да тыс қалмай, оларды қоғамға әлеуметтендіруде белсенді іс-шаралар жүргізілуде.
Одан бөлек, мұнда балалар үйінен бүлдіршіндер келіп, ата-әженің мейірімі мен қамқорын да сезіне алады.
Н.САЙЛАУҚЫЗЫ