2022 жылғы шілде айында Ұлттық қауіпсіздік комитеті кәсіпкерлік субьектілеріне заңсыз жолмен 135 миллиард теңге сомасындағы қаражатты қолма-қол ақшаға айналдыру және салық төлеуден жалтаруға ұзақ уақыт бойы көмектесіп келген адамдарға қатысты ауқымды қылмыстық істі тергеуді аяқтады. Бұл туралы ҰҚК баспасөз қызметі хабарлады. Заңға қайшы іс-әрекетке 300 адам, оның ішінде шетелдіктер бар және 500-ге жуық жалған компаниялар мен 5 мың контрагенттер тартылғаны белгілі болды. Биыл 5 желтоқсанда Қарағанды қаласы Қазыбек би аудандық соты осы іске қатысы бар 20 фигурантты Қылмыстық кодекстің 216-бабы 3-тармағы және 28-245-бабы 3-тармағы бойынша кінәлі деп танып, әртүрлі мерзімге соттады. Осы қылмысты тергеудің тәжірибесі Қазақстанда көлеңкелі экономикаға қарсы іс-қимыл бойынша жұмыстың алгоритмін жасап шығаруға мүмкіндік берді. Жалпы, заңсыз қолма-қол ақшаға айналдыру бағытында жұмыс жалғасып жатыр.