Халықаралық бокс қауымдастығы жылды қорытындылап, әлемдік рейтингті жаңартты. Оған сәйкес Қазақстан IBA рейтингінде бірінші орынға шықты.
Қайрат Сәтжанов баптайтын жігіттер еншісінде 48 100 ұпай бар. Екінші орынға Өзбекстан құрамасы жайғасты және қос команда арасындағы айырмашылық айтырлықтай үлкен. Көрші елдің жігіттері 37 600 ұпай ғана жинады. Ал үздік үштікті Үндістан түйіндеп тұр.
IBA рейтингіне бас-аяғы 135 елдің боксшылары енгізілген. Ондағы ұпай құрлықтық және әлемдік чемпионаттардағы жетістіктермен есептеледі.
Айта кетейік, Иорданияда өткен соңғы Азия чемпионатында жерлестеріміз 3 алтын жеңіп алған болатын. Халықаралық бокс қауымдастығы сайтында, әсіресе, Сәкен Бибосынов, Қамшыбек Қонкабаев, Серік Теміржанов, Асланбек Шымбергенов, Сағындық Тоғамбай, Нұрлан Сапарбай және ағайынды Нұрбек пен Айбек Оралбайлардың есімі ерекше аталып өткен еді.
