Қазіргі таңда Қытайда жағдай тұрақталып жатыр. 22 ақпанда аурудың өсу деңгейі 24 пайыз болса, 23 ақпанда 21 пайыз болды. Бұл туралы Қазақстанның бас санитарлық дәрігері Жандарбек Бекшин Орталық коммуникациялар қызметінде өткен баспасөз мәслихатында мәлімдеді.
– Бұны қуанышты ақпарат деп айтуға болады. Өйткені біздің ең бірінші назарымыз Қытай Халық Республикасында болып отыр, – деді ол.
Дегенмен бас санитарды коронавирус инфекциясы өршіп тұрған басқа елдер алаңдатады.
– Оңтүстік Кореяда екі күннің ішінде ауру деңгейі 2-орынға жетті. Бұл ауру көбінесе Корея Республикасының екі провинциясында тіркеліп жатыр. Осындай нәтижелер бізді алаңдатады. Неге десеңіз, Оңтүстік Кореямен тығыз қарым-қатынас орнатамыз. Ол жақта біздің 23 мың азаматымыз, заңсыз миграция да бар, – деді Бекшин.
Одан бөлек, коронавирус деректері тіркелген елдер тізімі мынадай:
Италия – 144 жағдай;Жапония – 132 жағдай;Сингапур – 89 жағдай;Иран – 43 жағдай;Таиланд – 35 жағдай;Малайзия – 22 жағдай;Вьетнам – 16 жағдай.
Денсаулық сақтау министрлігінің мәліметінше, 2020 жылдың 6 қаңтары мен 23 ақпанына дейінгі аралықта Қытайдан және Қытаймен шекаралас мемлекеттерден Қазақстанға 30 066 адам кірген, барлығы тексерілген. Бүгінге дейін 165 адам көпшіліктен оқшауланып, емге жатқызылған, оның 158-і шығарылып, 7 адам стационарларда медициналық бақылауда қалған.
Айдар ДӘУІТҰЛЫ
