Астаналық тұрғын алаяқтарға алданып, 4,6 миллион теңгесінен айырылды
Астаналық тұрғын алаяқтарға алданып, 4,6 миллион теңгесінен айырылды
Алаяқтар астаналықтарды сыйға көлік береміз деп алдаған, – деп хабарлайды Polisia.kz. Интернет-алаяқтың құрбаны болған елорда тұрғындары полицияға арызбен жүгінді. Тергеу барысында Сарыарқа ауданы ПБ криминалдық полиция бөлімінің қызметкерлері 23 және 24 жастағы екі қаскүнемді анықтады. Интернет-дүкеннің клиенттік базасына қол жеткізе отырып, жас жігіттер өздерін дүкен қызметкерлері ретінде таныстырып, клиенттерге қоңырау шалып, көлікті ұтып алғанын хабарлаған. Бірақ оны алу үшін жарна ретінде белгілі бір соманы салу керек деген. Жәбірленушілер 700 мыңнан 4 млн теңгеге дейінгі сома көлемінде ақшалай қаражат жіберген. Бірақ іс жүзінде “ұтыс ойынына” қатысушыларды жағымсыз тосын сый күтіп тұрды: ешқандай ұтыс ойыны болмаған. Олардың құрбандарының бірі елорда тұрғыны алаяқтарға 4,6 млн теңге жіберген. Қазіргі уақытта олар интернет-алаяқтықтың 14 фактісі бойынша күдіктеледі.
– Қазіргі уақытта күдіктілер Астана қаласының ПД Уақытша ұстау изоляторына қамалды. ҚР ҚК 190-бабы бойынша тергеу амалдары жүргізіліп, олардың елорда аумағында жасалған осыған ұқсас қылмыстарға қатысы бар-жоғы анықталып жатыр, – дейді Астана қаласы ПД Криминалдық полиция басқармасының бастығы Дастан Қалиев.