Қостанайда жоспарланған урологиялық операциядан кейін комаға түскен үш жасар бала қайтыс болды. Бала 21 қаңтарда таңғы сағат 11:00 шамасында көз жұмған. Қайғылы хабарды Облыстық денсаулық сақтау басқармасы растады.
"Жүргізіліп жатқан ем-домға қарамастан, операциядан кейін комаға түскен бала қайтыс болды. Медицина қызметкерлері, Денсаулық сақтау басқармасы мен Облыстық балалар ауруханасының ұжымы баланың ата-анасына, туған-туыстарына қайғысына ортақтасып көңіл айтады" делінген хабарламада.
Айта кетейік, 15 желтоқсанда 4 балаға жоспарлы ота жасалған болатын. Барлығына да анестезия пайдаланылған. Ота сәтті өткен. Бірақ бала екі сағаттан асса да есін жимаған. Ал бірнеше сағат өткен соң баланың дене қызуы көтерілген.
Кешке қарай үш жасар Әмірдің тыныс алуы қиындап, оған бірден реанимациялық шаралар жасалған. Артынан жансақтау бөліміне түскен.
Ата-аналар анестезияға реакция болуы мүмкін деген болжам жасады. Барлық инъекцияны бір ампуладан жасаған.
Әмірдің әкесі Денсаулық сақтау басқармасына арыз түсіріп, прокуратураға шағым жазған.
Дәрінің сараптамасы әлі аяқталған жоқ. Дәрігерлердің сөзіне қарағанда, оны жаңа туған нәрестелерге де еккен. Бірақ бұған дейін мұндай реакция болмаған. Дәріні артығымен салу дерегі де анықталмады.
Әмір осы уақытқа дейін жансақтау бөлімінде жатып, есін жимай, кеше қайтыс болды.
