Еліміздің теннис әлемінде жақсы жаңалық көп. Жас спортшымыз Томирис Нұржан Барселонада өткен Open Banc Sabadell U-14 Champion турнирінің жеңімпазы атанды.
Қазақстан теннис федерациясы мәлім еткеніндей, 14 жасар теннисші финалда жергілікті ойыншыны 6:4, 6:2 есебімен ұтты. Чемпионға сыйлықты Каталония мэрі тапсырып, оның жеңіске деген жігерін ерекше атап өтті. Осы жеңісінің арқасында Томирис сегіз үздік теннисшімен бірге сәуір айында Барселонада өтетін жарыста өнер көрсетеді. Бұл дода ATP 500 турнирімен қатар өтеді.
Сондай-ақ Юлия Путинцева Әбу-Даби WTA 500 турниріне жолдама алды. Әлемнің 45-ракеткасы іріктеу сайысының финалында дүниежүзілік рейтингте 152-орында тұрған өзбекстандық Нигина Абдураимовамен шеберлік байқасты. Біздің спортшы 6:2, 6:2 есебімен жеңіске жетті. Бір сағаттан астам уақытқа созылған бәсеке барысында ол 3 эйс жасап, 13 брейк-пойнттың жетеуін өз есебіне жазды. Н.Абдураимова 2 эйс, 3 брейкпен шектелді. Осылайша, Ю.Путинцева 6-12 ақпан аралығында өтетін негізгі жарысқа өтті. Оның алғашқы айналымдағы қарсыласы кейін анықталады. Айта кетейік, бұл додада Қазақстанның бірінші, әлемнің 10-ракеткасы Елена Рыбакина да өнер көрсетеді. Рейтингі жоғары болғандықтан, ол жарысты екінші айналымнан бастайды.
Айта кетейік, қазақстандық теннисшілердің әлемдік рейтингтегі орны анықталды. Әйелдер арасында Қазақстанның бірінші ракеткасы Елена Рыбакина 10-орнын сақтап қалса, Юлия Путинцева 44-тен 45-ке сырғыды. Жұптық сында Анна Данилина 11-сатыда тұрса, Е.Рыбакина 108-ден 111-ге түсті. Ерлер арасында еліміздің көшбасшысы Александр Бублик 36-дан 50-ге дейін құлдырады. Есесіне Тимофей Скатов 129-дан 127-ге көтерілді. Бұл – оның спорттық жолындағы ең үздік көрсеткіші. Жұптық сында Андрей Голубев 48-ден 47-ге жоғарыласа, Александр Недовесов 65-тен 67-ге сырғыды. Спортшылар осы аптадағы жарыстарда сәтті өнер көрсетсе, бұл рейтингтегі орнын жақсарта алады.
