Кездесуді филиал төрағасының орынбасары Мұханбет Жайлыбаев ашып, кездесудің мақсатын түсіндіріп, партия қызметкерлерімен таныстырды.
Төрағаның орынбасары 7 бағыттағы партиялық жоба бойынша жұмыс жүргізіп келе жатқан партияның негізгі жұмыстарын атап өтіп, алдағы уақытта осы жобалар аясында жұмысты бастауыш партия ұйымдарымен бірге жасауға ниетті екенін жеткізді.
Ұйымдастыру бөлімінің маманы Салтанат Қашағанова партиялық жобалармен қатар «Жер аманаты» комиссиясы өткен жылдан бастап іске қосылып, игерілмей жатқан жерлердің мемлекет меншігіне қайтарылып жатқанын, бұл жұмыстар алда да жалғасын табатынын айтты. Сонымен қатар бастауыш партия ұйымы түскен жарнаның пайызын әртүрлі шараға пайдалануға болатынын айтып, партияға тіркелуге шақырды. Жиында одан да өзге мәселелер сөз болды.
«Орталықтың алдымен өтетін жол Rixos-қа апаратын жол болғандықтан, өз уақытында мұнда кеңейту жұмыстары жүргізілді. Жол кеңейгенімен, жаяу жүргіншілерге арналған жолақ қоймай кеткен. Орталыққа емделуге келген тұрғындар жолдың арғы бетіне өтіп, көлік тоқтатуға мәжбүр болады. Адам өлімі болмай тұрғанда орталықтың алдынан жаяу жүргіншілер жолағы мен белгілерін орнату керек. Бұл жайында бірнеше рет ұсыныс айтқанбыз. Бірақ нәтижесіз қалып отыр», – деді облыстық стоматология орталығының директоры Қуат Машырықов.
«AMANAT» партиясы Маңғыстау облыстық филиалы төрағасының орынбасары айтылған ұсыныстың орынды екенін айтып, партия бұл мәселені бақылауға алатынын хабарлады.
Нұрлан ОРАЗҒАЛИЕВ