Жалпы, облысқа қарасты 7 аудан мен елді мекендерді көгілдір отынға қосу жұмыстары кезең-кезеңімен жүргізіліп келеді. Ең алғаш Қызылорда қаласының жылу көздерін және тұрғын үй секторын ілеспе газға көшіру жоспары іске асырылды. Содан бері 20 жылға жуық уақыт ішінде аймақты газдандыру көрсеткіші 70 пайызға жетті.
Соңғы жылдары Арал ауданындағы Жақсықылыш кенті, Шиелідегі Байсын мен Қазалыдағы Ғани Мұратбаев ауылына табиғи газ тартылып, қала маңындағы Қарауылтөбе елді мекені көгілдір отынның игілігін көрді. 2021 жылы Шиелі ауданына қарасты Ш. Қодаманов пен Н.Бекежанов ауылдарына газ тартылды.
Ал былтыр 10 жоба түзіліп, оны іске асыру үшін қомақты қаржы қаралды. Оның ішінде Жаңақорған ауданындағы Бірлік пен Қыраш, Аралдағы Сексеуіл кенті, Қармақшыдағы Төретам мен Ақай ауылдары, Қазалы ауданына қарасты Жалаңтөс Баһадүр, Басықара, Қ.Пірімов елді мекендері, Шиелідегі М.Шоқай ауылы маңынан газ тарату стансасын салу жоспарланған. Нәтижесінде, өткен жылы 589 шақырым газ құбыры тартылып, Қазалы ауданындағы 1 қала мен 3 ауыл, Шиелідегі 2 ауыл, Тереңөзек кентіндегі кейбір көшелер көгілдір отынға қосылды.
Биыл да қызылордалықтар үшін жағымды жаңалықпен басталды. Жаңақорған ауданының Бірлік және Қыраш елді мекендері табиғи газға қосылды.
«Өткен жылы облыс аумағында жүргізілген жұмыстар нәтижесінде 26 елді мекен, 583 мыңға жуық тұрғын табиғи газбен қамтылды. Биыл республикалық бюджеттен 7,4 млрд теңге бөлініп, өткен жылы басталған 7 жоба жалғасын тапты. Тағы 12 жаңа жобаны іске асыруға кірістік. Оның ішінде Жаңақорған ауданының «Жайылма», «Шалқия», «Құттықожа», «Төменарық», «Кейден» ауылдарын газдандыру жұмыстары басталады. Бұдан бөлек, өткен жылы құны 3,4 млрд теңгені құрайтын Жаңақорған кентіндегі 10/0,4 кВ электржелілік жүйені жаңғырту жұмыстары қолға алынған. Соның арқасында кенттегі 70 шақырымға жуық электр желісі жаңарып, қосымша жаңадан 23 трансформатор орнатылады», – дейді облыс әкімі Нұрлыбек Нәлібаев.
Ақүйік ауылдық округіндегі Бірлік ауылына газ құбырын Gas Energy Construction ЖШС жүргізді. Жоба республикалық және облыстық бюджеттен қаржыландырылып, 440 тұрғын үй мен 5 әлеуметтік нысан газдандырылды. Қыраш елді мекеніндегі 124 тұрғын үй мен 6 әлеуметтік нысан көгілдір отынға қосылды.
Алдағы уақытта тағы да 5 ауылды газбен қамту жоспарланған.
Ербақыт ЖАЛҒАСБАЙ,
Қызылорда облысы