Астана қаласының Жастар саясаты мәселелері басқармасының қолдауымен, ал «Республикалық студенттік құрылыс және жастар жасақтары қозғалысы» қоғамдық қорының ұйымдастыруымен жүзеге асқан игі істің игілігін көріп жатқандардың көптігі көңіл қуантады.
«Жасыл ел» жастар еңбек жасақтары бағдарламасы 2005 жылдан бастап республиканың барлық өңірінде және Астана қаласы бойынша жүзеге асырыла бастады. Осы 18 жыл ішінде Астана қалалық «Жасыл ел» штабы елордада елеулі еңбектер атқарып, 14 және 35 жас аралығында жұмыссыз жастар мен студенттерді жазғы еңбек маусымында жұмысқа орналастыруға атсалысып келеді.
Астана қаласы «Жасыл ел» штабы ел бойынша еңбек ету және сарбаздарды жұмыспен қамту жағынан оң нәтиже көрсетуде. Оған сәйкес жыл сайын «Жасыл ел» сарбаздары қатарында жұмыс істеуге өтініш білдіруші жастардың саны да артып отыр. Олар қаланың құрылыс нысанында әртүрлі санаттағы шеберлердің, оның ішінде құрылыс инженерлері, технологтар, монтаж-құрылыс жұмыстарының шеберлері көмекшісі қызметтерін атқарып, қала маңындағы жасыл белдеуде ағаш отырғызу, талдар мен көшеттерді қопсыту және суару арқылы табиғат пен қала келбеті үндестік тапқан бірегей экожүйенің қалыптасуына көмегін тигізуде. Одан бөлек, елордалық «Жасыл ел» сарбаздары қаладағы қарттардың үйін қысқы мезгілге дайындап, қолғабыс етуде де елеулі еңбек етіп жатыр. «Бұл бағдарламаға 14 жастан бастап мектеп оқушылары, студенттер және 35 жасқа дейінгі жұмыссыз жастар қатыса алады. Қатысушыларға 65 мың теңге көлемінде сыйақы төленеді. Жастар қаламыздың саябақтарында, құрылыс нысандарында, «Жасыл белдеуде» еңбек етеді», – дейді Астана қаласы Жастар саясаты мәселелері басқармасының бөлім басшысы Атымтай Бағдат. Ал «Жасыл ел» жобасының жетекшісі Абдурашид Асылбектің айтуынша, ашылу салтанатымен қатар, колледж аймағында ағаш отырғызу шарасы да өткізілген.
Биыл жоба аясында 4 200 жасөспірім мен жасты жұмыспен қамтып, оларды ақшалай сыйақымен қамтамасыз ету көзделген. Олардың қатарында көпбалалы, әлеуметтік аз қамтылған отбасылардан шыққан балалар да бар. Жобаға қатысатын жастардың барлығы арнайы экипировкамен қамтамасыз етілсе, жазғы еңбек маусымында жастарды жұмыспен қамтуға «Базис-А» құрылыс компаниясы, «Астана көгалдандыру құрылысы» АҚ, «Астана орманы» ЖШС, 100-ден астам білім беру мекемесі, 20-ға жуық колледж және 10-нан астам жоғары оқу орны серіктес болуға келісім беріп отыр.
Бағдарлама бойынша биыл осымен екінші рет жұмыс істегелі отырған 1-курс студенті Ислам Айтқалиев: «Мұнда жаңа орта таптым және жаңа достармен танысуға мүмкіндік алдым. Ай сайын бізге жалақы төленеді. Тапқан табысымды күнделікті қажеттілікке жұмсасам, бір бөлігіне ата-анама сыйлық сатып алдым. Жаз мезгілімен қоса, күзде де жұмыс істедім. Ең маңыздысы, бағдарлама ұсынған жұмысты күзде оқумен қатар алып жүруге болады. Уақыты да бізге қолайлы екен», – дейді.
Айта кету керек, еңбек жасағына қатысуға өтінім қабылдау 20 мамырға дейін жүргізіледі. Жобаға қатысқысы келетін мектеп оқушылары болса, өз мектебіне жүгіну керек.
Ж.МҮСІЛІМ