Қабылдауға келгендердің қатарында аудандық мәслихаттың депутаттары, белсенді азаматтар болды. Көтерілген мәселеге жауап беретін мемлекеттік органдардың өкілдері жиынға онлайн режимде қатысты.
«Елімізде ауруханасы жоқ жалғыз аудан – Целиноград ауданы. Стационарлық емхананы ғана қанағат тұтып отырмыз. Тұрғындарға шамамен 250 төсек-орындық аурухана қажет. Аудан әкімдігі оның құрылысына арнап 7 гектар жер бөлді. Мәселе осымен ғана шектеліп қалды», – деді Целиноград ауданының мәслихат депутаты Динара Әбдірахманова.
Ол ауруханадан бөлек, мәйітхана мен сот-медициналық сараптама жүргізетін орын ашу жұмысы да кезек күттірмейтінін атап өтті.
Мәслихат депутаты ауданға қарасты ауылдың бірі – Қараөткел тұрғындары Астанадағы №12 емханаға бекітілгенін жеткізді. Алайда бір жарым жылдан бері ауылдағы мектеп медицинасының мәселесі шешілмеген. Оқушылар аталмыш емханаға бекітілмеген. Салдарынан 1 430 балаға жоспарлы вакцина да салынбапты.
Өз кезегінде Ақмола облысының Денсаулық сақтау басқармасының басшысы Нұрлан Ақылбеков ауылдың барлық тұрғыны биыл қаңтарда басқарма қаулысына сәйкес №12 емханаға бекітуге берілгенін атап өтті. Соның ішінде мектеп медицинасы да бар. Алайда Астана қаласы Денсаулық сақтау басқармасы тиісті құжатқа қол қоймағандықтан, вакцина салу жұмысы әлі шешімін таппаған.
Ал аудандағы аурухана тапшылығы мәселесін Ақмола облысы әкімінің бірінші орынбасары Малғаждар Тәткеев былай деп түсіндірді:
«Аудан әкімдігі аурухана салуға арналған жер учаскесін бөлді. Бүгінде техникалық-экономикалық негіздеме әзірленіп жатыр. Соған қарамастан аурухана салуға қажет қаражат әлі қарастырылған жоқ», – деді облыс әкімінің бірінші орынбасары.
Өз кезегінде «AMANAT»-тың Атқарушы хатшысы партия бұл мәселені бақылауда ұстайтынын және аманаттықтар аурухана тұрғызуға, тұрғындардың өмір сүру жағдайын жақсартуға мүдделі екенін атап өтті. Динара Әбдірахманова Талапкер және Қараөткел ауылдарында, аудан аумағында қоқыс төгетін полигон, қатты тұрмыстық қалдықтарды жинайтын, сұрыптайтын орын қажет екенін атап өтті. Белсенділер тобы аудандағы өзекті мәселе – электр желілеріне қатысты мәселені де көтерді.
Республикалық қоғамдық қабылдау алаңында қаралған тағы бір мәселе – жер дауы. Осындан үш жылға жуық уақыт бұрын ерлі-зайыпты Нұрғали Көпбосынов пен Мәншүк Сыздықова Түркістан қаласындағы жер учаскесінен айырылып қалған. Олардың сеніміне кірген Ғ.Оспанов есімді азамат сенімхат жаздырып, аталған телімді мемлекеттің қажеттілігі үшін Түркістан қаласының әкімдігіне қомақты қаражатқа сатып жіберген. Даулы мәселе бірнеше жылға созылған. Қазір жер телімі ерлі-зайыптылардың атында. Алайда онда қалалық әкімдік бастап кеткен құрылыс жұмысы жүріп жатыр. Елнұр Бейсенбаев онлайн режимде әкімдіктегі жауапты тұлғалармен әңгімелесіп, жуық арада мәселенің оң шешімін табу қажет екенін атап өтті. Іс барысын Атқарушы хатшы өз бақылауына алды.
Сондай-ақ қабылдауға «Темекі түтінінен азат Қазақстан үшін» ұлттық коалициясының көшбасшысы Жәмила Садықова келіп, электронды темекінің тұрғындар денсаулығына қауіпті екенін атап өтті.
«Бүгін көтерілген барлық мәселені жеке бақылауымда ұстаймын. Жобалау-сметалық құжаттама дайын болған кезде республикалық бюджеттен аудандық аурухананың құрылысына қажет қаражат бөлуді қолға аламыз. Балаларға екпе жасау мәселесі де көп кешікпей өз шешімін табады. Ал тұрмыстық қатты қалдықтар полигонын ашу мәселесі бойынша Астана агломерациясына түзету енгізуге атсалысамыз. Ауданға қарасты барлық елді мекенде қатты тұрмыстық қалдықтарды жинауға болатын резервтік аумақтар қарастырылады», – деп түйіндеді Елнұр Бейсенбаев.
Ж.АМАНГЕЛДІ