Лотерея тарихына көз жүгіртсек, сонау XV ғасырдың өзінде-ақ алғашқы лотерея билеттерін сатудан түскен қаржы жарлы-жақыбайларды қолдауға бағытталғанын көруге болады. Ал кейінірек, тіпті Еуропада лотерея өткізудің арқасында порт ғимараттары, сағат мұнаралары мен су арналары салына бастаған. Одан бөлек, лотерея жүйесі дами түскен сайын оның қағидалары мен идеялары аясында түскен ақшаның бір бөлігін спортты дамытуға жұмсау дәстүрі қалыптасты. Бұл дәстүр «Сәтті Жұлдыз» ұлттық лотереясында айшықты көрініс тапты. Тіпті, осынау ұтыс ойынын құрудағы бір мақсат – қазақстандықтарға жоғары жүлде қоры мен қомақты ақшалай ұтыстары бар халықаралық деңгейдегі лотерея өнімдерін ұсыну үшін ғана емес, ел бюджетінің ақшасын пайдаланбай, спортты дамытуға көмектесу болды деп айтуға болады. Қалай дегенде де лотереядан түскен табыстың бір бөлігі спорт саласына салынатыны анық.
Сондай-ақ «Сәтті Жұлдыз» ұлттық лотереясы әлеуметтік маңызы бар жобаларға, соның ішінде ауылдық жерлердегі жобаларға үлкен қолдау көрсетіп келеді. Мәселен, компания әлемдік рекордшы, қазақ палуандарының күш өнері дәстүрін жалғастырушы Сергей Цырульниковтің бастамасымен қолға алынған «100 ауыл» жобасын қаржыландырып жатыр. Бұл жоба ауыл жастарымен тәрбие жұмысын жүргізіп, балаларды қазақ спортының тарихымен таныстырады. Спорт пен саламатты өмір салтын дамытуға бағытталған. Сонымен қатар бастама аясында шеберлік сабақтары, ашық тренингтер мен мотивациялық кездесулер өткізіліп тұрады. Осы бағдарламаның арқасында 100-ден астам ауыл мектебі спорттық құрал-жабдықтармен қамтамасыз етіліп, жалпы Қазақстанның түкпір-түкпірінен 30 мыңнан астам бала қамтылды. Қазақстан халқы Ассамблеясының ХХХІІ сессиясында сөйлеген сөзінде Мемлекет басшысы Қасым-Жомарт Тоқаев әлеуметтік жобаларды жүзеге асырудың маңыздылығын атап өткен болатын. «Біздің чемпион Сергей Цырульников бірде-бір бюджет қаражатынсыз «100 ауыл» жобасын өз күшімен бастап, 100-ден астам ауыл мектебін спорттық құрал-жабдықтармен қамтамасыз етті», – деді Президент.
«Сәтті Жұлдыз» ерекше назар аударып отырған спортты қолдауға бағытталған тағы бір әлеуметтік жоба – «Сұлу – бақытты балалық шақ аумағы» жобасы. Компания оны Қазақстанның эстетикалық топтық гимнастика федерациясымен бірлесе жүзеге асырды. Бұл бастама ауылдан келген қыздарға гимнастикамен айналысуға мүмкіндік берді. Қосымша педагогикалық оқудан өткен кәсіпқой жаттықтырушылар өз шәкірттерінің денсаулығын нығайтып қана қоймай, олардың бойында жастайынан мінез-құлық, сенімділік пен тәртіп қалыптастыруда.
Сонымен қатар «Сәтті Жұлдыз» серіктестігі қолдау көрсеткен тағы бір маңызды бағыт, ол – шахмат. Бүгінде қазақстандық шахматшылардың халықаралық аренадағы жетістігін бүкіл әлем тамашалап отыр. Осынау интеллектуалдық ойынға құмар қазақстандық жастардың көбейіп келе жатқаны қуантады. Мәселен, Қазақстандағы тұңғыш әлем чемпионы Бибісара Асаубаеваның кубогын сарапқа салған кішкентай шахматшылар арасында биыл сәуір айында өткен балалар турниріне «Сәтті Жұлдыз» компаниясы қолдау көрсетті. Қатысушылар өздерінің қарым-қабілеттерін паш етіп қана қоймай, әлемнің көрнекті шахматшылары – Хоу Йифан, Хайк Мартиросян, Владимир Крамник, Борис Гельфанд, Винсент Кеймер және тағы басқалармен танысуға мүмкіндік алды.
Тағы да айта кетер бір жайт, «Сәтті Жұлдыз» ұлттық лотереясы 2022 жылдың қорытындысы бойынша, қазақстандық спортты дамытуға 3 785 314 768 теңге, ал компания жұмыс істеген барлық кезеңде 7 088 426 767 теңге бөлген. Сондай-ақ биылдан бастап «Сәтті Жұлдыз» түскен қаражат пен жүлде қоры арасындағы айырмашылықтың кемінде 10 пайызын заң бойынша «Қазақстан халқына» қоғамдық қорына аударып отыруы тиіс. Норма 2023 жылы ғана күшіне енгенімен, компания 2022 жылы бұл қорға ерікті түрде 101 миллион теңге аударған. Ал 2023 жылдың бірінші тоқсаны қорытындысы бойынша «Сәтті Жұлдыз» «Қазақстан халқына» қорына 1 млрд теңге аударды.
Өкінішке қарай, елімізде көптеген азаматтар құмар ойындарына тәуелді бола түсуде. Бұл – адамның қаржылық жағдайын ғана емес, оның өзінің де, отбасының да менталды денсаулығын да нашарлататын теріс әдет. Шындығына келгенде, бұл мәселе қоғамда өзекті бола түсуде. Ел болашағына қауіп төндіретін күрделі әлеуметтік мәселеге айналып барады. Сондықтан да қазақстандықтар арасында құмар ойындарға тәуелділік қаупін барынша азайту мақсатында «Сәтті Жұлдыз» компаниясы тегін семинарлар мен «Жаңа өмір» лекцияларын ұйымдастырып келеді. Оның аясында мамандар ойыншылар мен олардың отбасы мүшелеріне құмар ойынын ойнау ақша табудың жолы емес екенін, керісінше, тәуелділікке алып келетін қауіпті құбылыс екенін түсіндіріп жатыр. Мұндай кездесулер құмар ойындарға тәуелділікпен күресуге және ондай адамдардың санын азайтуға көмектеседі. Ал мұндай проблемаға тап болғандарға кәсіби мамандар құмар ойындарға тәуелділіксіз жаңа өмір бастауға көмектесуге тырысады.
Нұрлан ҚОСАЙ