Үш күнге созылған атаулы шарада Еуропа және Қазақстаннан келген 2 мыңнан астам қазақ бас қосты.
Алқалы жиынға Қазақстан Президентінің кеңесшісі Мәлік Отарбаев, Еуропаның 15 елінен келген 20-дан астам қазақ ұйымының жетекшілері, «Отандастар қорының» президенті Абзал Сапарбекұлы, Қарағанды облысы Қарқаралы ауданының әкімі Ерлан Құсайынов және Аустрия, Бельгия, Германия, секілді елдердегі қазақ диаспорасының өкілдері мен Қазақстанның Германиядағы елшілігінің қызметкерлері қатысты. «Отандастар қоры» құрылтайды ұйымдастыруға қолдау көрсетті. Кёльндегі Қазақ мәдени орталығының төрайымы Сәдия Сүрер жетекшілік етті. Құрылтайда Қазақстан Президентінің кеңесшісі Мәлік Отарбаев Президент Қасым-Жомарт Тоқаевтың ыстық ықыласын жеткізіп, еліміздегі саяси реформалардың жай-күйін айтып берді. «Алдымен ел Президенті Қ.Тоқаевтың сіздерге деген зор ықыласы мен ыстық сәлемін жеткізгім келеді. Мемлекет басшысы Германия елінде басталған бүгінгі құрылтайға сәттілік тілеп, арнайы құттықтауын жолдады. Шетелде жүрсеңіздер де, ұлттық құндылықтарымызды сақтау үшін бар мүмкіндіктеріңізді сарп етіп, жұмыс істеп жатырсыздар. Біз мұны өте жоғары бағалаймыз. Біз үнемі сіздерге тілеулеспіз. Әркез қолдау көрсетуге дайынбыз», – деді Мәлік Отарбаев өз сөзінде. Сонымен қатар жиынның жылдағы басқосудан ерекшелігі – жергілікті қандастарымызбен бірге Еуропада білім алып, кәсіппен айналысып жүрген отандастарымыз да бой көрсетті. Бұнымен қоса, елімізден тарихи Отанына қоныс аударған бұрынғы қандастарымыз – алманиялық немістер де қатысты. Құрылтайда диаспора өкілдерімен, еуропалық қазақ жастарымен кездесу, кітаптың тұсаукесері, ұлттық нақыштағы киімдер мен қолөнер бұйымдарының жәрмеңкесі, Абай үйінің ашылу салтанаты, этнофото көрмелер, түрлі спорттық жарыс өтті. Атаулы шара Қазақстаннан барған белгілі өнер жұлдыздарының ән шашуымен қорытындыланды.