Әсіресе, «AMANAT» партиясының өміршең жобаларының негізінде халықтың талап-тілегі ескеріліп, алақандай ауылдардағы түйткілді мәселелер рет-ретімен шешімін тауып келеді.
Бүгінде Сырдария ауданына қарасты Ақжарма ауылында 2 800 адам тұрады. Негізгі кәсібі күріш шаруашылығымен тығыз байланысты елді мекенде халықтың қажеттілігін туғызатын ауызсу, жол, жарық мәселесінде анау айтқандай қиындық жоқ. Алайда ауылда тұрғындардың бос уақытын тиімді өткізіп, серуендеп, бой сергітетін орын болмаған. Соған орай партия пәрменімен ауылдағы Тағзым алаңы қайта түлеп, ел игілігіне пайдалануға беріліпті.
«Негізінен Ақжарма ауылының іргесі 1967 жылы қаланған. Ауылымызда 1941-1945 жылдары сұрапыл соғыста ерлікпен қаза тапқан жауынгерлердің ескерткіші бар. Бұл Тағзым алаңында майдан даласында қалған боздақтардың тізімі тасқа қашалып, жазылған. Алайда көп жылдан бері жөндеу көрмеген алаңның ажары қашып тұрған болатын. Соған орай ауылдан сайланған «AMANAT» партиясы депутаттық фракциясының мүшесі, «Ақжарма-2» шаруа қожалығының төрағасы Марат Бисеновтың демеушілігімен «Ер есімі – ел есінде» алаңына қайта жаңғырту жұмыстары жүргізіліп, игілігін ел көріп отыр», – дейді ауыл әкімі Ерлан Ешмұратов.
Әкімнің айтуынша, биыл ауыл тумасы, елді мекеннің өркендеуіне елеулі үлес қосып жүрген Нұртаза Серікбаев есімді азаматтың бастамасымен және және сыныптас құрдастарының мектеп бітіргендеріне 50 жылдығына орай Екінші дүниежүзілік соғыста қайтыс болғандардың тізімі жасақталып, тасқа қашалып жазу жұмыстары жүргізілген. Оған қажетті мәрмәр тастар мен басқа да жаңалау жұмыстарына ауыл депутаты, шаруашылық төрағасы Марат Бисенов шаруа қожалығының есебінен қомақты қаржылай демеушілік көрсеткен. Ал бұл жұмыстарға барлығы 3,5 млн теңге қаржы қаралып-ты.
«Ауылымыздағы «Ер есімі – ел есінде» аталатын Тағзым алаңы жан-ашыр азаматтардың арқасында қайта жаңарды. Алаң 9 мамыр – Жеңіс күні қарсаңында пайдалануға берілді. Бұл күні ауыл ақсақалдары жиналып, өлі аруаққа құран бағышталды. Ауылдық мәдениет үйінде өткен арнайы іс-шарада тұрғындар алаңды қайта жаңғыртуға атсалысқан азаматтарға алғыс сезімін білдірді. Бүгінде жаңарған кейіпке енген Тағзым алаңы ауыл көркіне өзгеше рең беріп қана қоймай, халықтың жиі шоғырланатын орнына айналды», – деп ойымен бөлісті ауыл әкімі.
Ауыл тұрғындарының айтуынша, алаңда 127 боздақтың есімі тасқа қашалып, жазылған. Деректерді жинауға бір жылға жуық уақыт жұмсалса керек. Соның негізінде ауылдан сайланған халық қалаулысының ықпалымен жоспарланған жұмыстар толықтай жүзеге асырылыпты. Сонымен қатар ауылдағы ескі мешіт ғимараты да шаруашылық төрағасының ықпалымен күрделі жөндеуден өткізіліп, асхана ретінде қайта пайдалануға беріліпті.
Жалпы ауылдан сайланған партия фракциясының мүшесі халықпен жиі кездесу өткізіп тұрады екен. Онда тұрғындар ауылдың өзекті мәселелерін ортаға салып, оны шешудің тиімді тетіктерін талқылайды. Соның нәтижесінде ауылға облыстық бюджеттен 2,5 млн теңге қаралып, күрмеулі күткен бірқатар мәселенің оңтайлы шешілуіне сеп болыпты. Сол үшін де ауылдағы ағайын жанашыр азаматтардың атқарған жұмыстарын жоғары бағалап отыр.
Ербақыт ЖАЛҒАСБАЙ,
Қызылорда облысы