Әбден тозығы жеткен ғимараттың шатыры қайтадан салынып, жаңа терезелер орнатылуда.
Қыркүйекке дейін мектептің оқу кабинеттері, асханасы және спортзалы жөнделеді. Жалпы жөндеу жұмыстарының 80 пайызы толығымен аяқталған. Мектеп директоры Қалима Дайырова ғимаратқа күрделі жөндеу өте қажет болғандығын айтады.
«Бұл мектепте мәселе көп болды. Ең бастысы – электр құрылғылардың ескіруі, су құбырының жоқтығы және де кәріз жүйесінің болмауы. Суды ауладағы ұңғыдан аламыз, онда да оның суы өте нашар», – дейді ол.
Жалпы өңірде 80-нен астам мектеп жөндеуден өтіп, 5 мыңнан астам орынға есептелген 14 жаңа мектептің құрылысы жүріп жатыр. Көбі облыс орталығы мен Астана маныңдағы аудандарда. Соның алтауы жаңа оқу жылының қарсаңында іске қосылмақ. Жаңартылып жатқан ғимараттар өткен ғасырдың ортасында салынған. Білім ордалары енді жаңа оқу жылы қарсаңында жаңа кабинеттермен жасақталып, заманауи құрылғылармен жабдықталмақ. Аудандық партия филиалы жанындағы Партиялық бақылау комиссиясының мүшелері мектептің жөндеу жұмысымен танысып, жүргізіліп жатқан істерді тағы бір пысықтады.
Жалпы, Бұланды ауданына қарасты Вознесенка және Қараөзек ауылдық мектептерінде жаңа модификациядағы кабинеттер ашылып, қажетті құрылғылармен жабдықталмақ. Ол құрылғылар дайын, жөндеу жұмыстары аяқталғаннан кейін орнатылмақ. Спортзалдармен алғашқы әскери дайындық кабинеттері жаңа қажетті құрал-жабдықтармен қамтамасыз етілмек. Бұл жұмыстардың барлығы партия депутаттарының жіті бақылауында болады.