Кездесуге жиналған жастар өз шығармашылығындағы Абай тақырыбы мен Абай шығармашылығының тереңіне шомып, еркін түрде бір-бірімен пікір алмасты.
«Абайдың туған күні қарсаңында ұйымдастырылып жатқан түрлі форматтағы шаралар Астанада ғана емес, еліміздің барлық өңірінде өтуде. Ал Астанада қаламгерлер аллеясында ұйымдастыруымыз жастарымызға ерекше әсер етеді деп ойлаймын», – дейді «AMANAT» партиясы жанындағы «Жастар Рухы» Жастар қанаты төрағасы Нұржан Жетпісбаев.
Шараға қатысушы жастар ұйымдастырушыларға алғыс айта отырып, алдыңғы аға буын өкілдерінің өмір жолымен терең танысты. Шараға арнайы келген шығармашыл жандардың қатарында Жазушылар одағының және Журналистер одағының мүшесі Мирас Асан, Жазушылар одағының мүшесі, Egemen Qazaqstan газетінің тілшісі Жәнібек Әлиман, Жазушылар одағының мүшесі Батырхан Сәрсенхан, сондай-ақ абайтанушы ғалым Алмахан Мұхаметқалиқызы да болып, өзінің Абай шығармасы мен өнегелі өмірі туралы тың деректер айтты.
«10 тамыз – Абайдың туған күні. Мен Абайға тек бір күн емес, осы тамыз айын түгелдей арнау керек деп ойлаймын. Бізге бұл еш уақытта артық болмасы шын. Осындай шаралар арқылы Абайды айтып қана қоймай, мектепте, оқу орындарында арнайы пән ретінде енгізуді міндеттеу керек. Оның әр сөзін, әр өлеңін талдап оқу жастардың рухын көтерері сөзсіз. Оның терең ой тұңғиығына үңілу әрқайсысымызға парыз деп ойлаймын. Абай дана екенін әр азаматтың, әр тұлғаның жүрегіне орнықтыру керек. Ал ұлы ойшылдың өмір жолына ерекше зерттеу жасау – өз алдына бір ғылым», – дейді абайтанушы ғалым Алмахан Мұхаметқалиқызы.
Мәні маңызды кешке мектеп оқушылары мен студенттер де келіп қатысты.
Кеш барысында жастар ақын-жазушылармен пікір алмасып, Абай Құнанбайұлының өлеңдерін мәнерлеп оқыды, Абайдың қара сөздерін талқылады. Сондай-ақ шарада Абай әндері әуелеп, акапелла түрінде де шырқалды.
Бердібек ХАБАЙ